Shillong, Nailar 19 : Ka kynhun ïalehkai jong ka Hunter FC, ka la ïoh ban rah ïa ka nam lahduh ha ka Independence Cup, kaba la pynïaid ïa ka da ka Seng Samla bad ka Sports Club jong ka dong Riat Laban-Kynjah Phutbol, Shillong, kaba la long ha ka madan ïalehkai ba juh tip ne khot ïa ka Madan Rit.
Ïa kane ka lympung ïalehkai la pynlong ha ka 15 tarik Nailar 2025, ka long artad kum shi bynta ka jingïasnoh kti lang da ki paid nong shong shnong jong kane ka dong ban rakhe ïa ka sngi ïoh laitluid jong ka ri.
Haba phai sha ka jingïakhun kaba ïakhaid bad biang bor bha, ka kynhun ïalehkai jong ka Hunter FC ka la lah ba kan pynliem lyngba ka tie breaker ïa ka Tylli Kawei FC.
Kane kadei hadien ba ka jingïakhun hapdeng madan ka la kut noh da ka jingïakhaid mar shi kol.
I Kongsan ba donlang ha kane ka sngi ïakhun phainal dei i Kong DBS Mukhim, ba dei ka Deputy Commissioner of Food Safety (Enforcement) nangta u Rangbah Shnong, ki dkhot nongkit kam ka shnong bad ki paid nong shong shnong.
Shwa ban sdang ïa ka prokram la don shwa ka jingrakhe ïa ka jingdap 79 snem ka jingïoh laitluid ka ri. Bad ïa ka prokram la pynkut da ka jingsam ïa ki khusnam sha baroh ar tylli ki kynhun kiba la poi sha ka phainal.
