Yn sdang pyntrei noh ïa ka surok Amlarem-Pdengshakap, jurip ki nongïalam shnong bad u Contractor

Jowai, Nailar 16: Ki nongïalam shnong hapoh ka lama jong ka Synjuk ki Waheh Shnong War Jaiñtia lem bad u Contractor u ma Friday Hinge mynta ka sngi saitjaiñ 16 tarik u Nailar 2025 kila pynlong ïa ka jingleit jurip bad ban ïa phylliew jingmut lang hashwa ban sdang pyntrei noh ïa u surok na Amlarem sha Pdengshakap uba don 10 kilo miter eiei haka jinglut kaba 8 klur tyngka.
La pyntip ba une u surok u lah ban pynïasoh ïa ki 36 tylli ki shnong jong ka thaiñ Amlarem War East, u ma Kolmen Pohshna kum u Adviser jong ka Synjuk ki Waheh Shnong ula pynsngew ba u Contractor un pyntrei ïa une u surok katkum ka order bala pynbeit da ka sorkar bad yn pyntrei ïa u da ka bor ki briew bad ka rukom siang ïa u maw bad ka rong ka long tang shi syrtap.
Ula pynpaw ka jingai khublei ïa u MLA ka thaiñ u ma Lahkmen Rymbui bad kumjuh ïa u MDC ka War East kiba la trei shitom ban wanrah ïa kane ka skim na ka bynta ka jingsuk ka leit ka wan jong paidbah nongshong shnong.
Hashwa kane kala don ka jingïalang hapdeng ki Waheh Shnong ka thaiñ, u Dolloi bad u Contractor ha Dorbar Hall ka shnong Pdengshakap bad na ka liang u Contractor ruh u ma Friday Hinge ula kular ban pyndep ïa une u surok hapoh san (5) bnai bad ka kam kala sdang ban ïaid shait shait mynta.
U Dolloi ka Elaka Satpator ma Daman Lakashiang ula ong ka jingïakynduh mynta ka sngi kala long kaba sngewtynnad hapdeng ki Waheh Shnong bad u Contractor bad u kyrmen skhem ba ka rukom shna ïa u surok kan long kaba skhem bad ka shngaiñ ban ïait ki kali ki mator, ula kyntu ïa baroh ki nongshong shnong ba kin ïa snohkti da kaba ïatreilang khnang ba ka kam kan long kaba jop.
U Waheh Shnong ka Amlarem u ma Kampher Pohlong ula ong ka jingmut ba wan sakhilang mynta ka sngi ka long shi bynta ban ïa phylliew jingmut lang hashwa ba sdang noh ka kam, kum ki nongïalam shnong ki kwah ba ka kam kan long kaba ïaid beit ïaid ryntih, da kaba kyntu ïa u Contractor ban pynbiang ïa ki kot ki sla ba donkam jong ki nongtrei khamtam ki bar jylla bad la kyntu ba un ai kam kumjuh ïa ki trai jylla kiba dei ki nongshong shnong ka thaiñ.