Ba kthong bad mut bom ki para nongdih drok bym hun ïa ka bhah die mobile tuh

Nongpoh, Nailar 14: Tang na ka daw ka jingïaknieh pisa para ba ïa dih drok lang hadien ba ki la dep ban tuh ïa kawei ka Mobile bad na ka daw ka jingbym ïa hun ïa ka rukom sam pisa la mih ka jingïathud para maki, uwei u samla u la ryngkoh syndon sha wah Umtrew ha Byrnihat, hadien ba u la shah beh ha ki paralok kiba thmu ban bom ban shoh ïa u.
Kane ka jingjia ka la jia hynnin ka sngi ha Byrnihat, ha ka por 9 baje ei ei mynstep ha kaba uwei u samla ba la tip kyrteng kum u Wanphrangsngi Syiemlieh, 27 snem ka rta na ka shnong Nongkyndang Saiden, u la shah beh ha ki paralok kiba ym hun ïa ka jingïasam pisa na ka Mobile kaba ki tuh bad kaba la dep ban die, hynrei une samla ha ka jingtieng u la leit ryngkoh sha wah na ka daw ba u sheptieng ba ioh shah bom shah shoh ha ki paralok kiba ïa dih drok lang ha Byrnihat.
Shuh shuh, la ong ruh kane ka jingjia ka la jia tang na ka daw ka 300 tyngka, kaba une u samla um shym la ai ïa kitei kiwei ki paralok, ha kaba ki la thmu ban bom ban shoh ïa u, hynrei ban lait na ka jingshah bom shah shoh, u la phet noh ïa lade bad ba kitei ki paralok ba ïa dih drok lang ki la beh ïa u bad ha ka jingtieng u la leit ban kynthih sha wah Umtrew ha Byrnihat.
Halor katei jingjia naka liang ka kynhun SRT, Fire and Emergency Service lem bad ki pulit ka Byrnihat mynta ka sngi kila hiar sha katei ka wah ban wad ïa utei u samla bad haduh mynta ym pat lapdien satia bad ym pat ioh jingtip la utei u samla u dang im ne u la ngam jyllop ha katei ka wah katba ka jingwad jong ki pulit ka dang bteng ban lapdien ïa utei u samla.