Nongstoiñ, Nailar, 12: U Superintendent of Police West Khasi Hills District Bah B.D.Marak MPS, u la pyntip ba ha ka 16 tarik u Naitung 2021, la ïoh pdiang ka ejahar pyrshah ïa u Kitborlang Shangrit ba u la leh ïa ka kam thom bor beijot pyrshah ïa kawei ka khynnah rit. Halor kane ka jingjia la rujor mokotduma pyrshah ïa une u nongleh runar hapoh ka Nongstoiñ P.S. Case No. 46(7)2021 hapoh ka kyndon 5(1)/6 jong ka aiñ POCSO bad la aiti ïa ka jingtohkit sha ka WPSI L. Shangshai jong ka Nongstoiñ Women Police Station na ka bynta ban tohkit bniah.
Hadien ba la pyndep ïa ka jingtohkit, la thoh ïa ka kot jingmudui bad la phah sha ka kashari jong u Nongbishar Kyrpang (POCSO) Nongstoiñ, ban shim bishar ïa ka kam.
Ha ka 31 tarik u Naitung 2025, ka Kashari lyngba u Nongbishar Kyrpang (POCSO) Nongstoiñ. Hadien ba ka la bishar bniah ïa ki sakhi kiba la pyni ha ka jingtohkit bad ha ka jingbishar, ka la pynmih rai pyrshah ïa u Kitborlang Shangrit, kata da kaba set phatok haduh arphew snem kynthih, ryngkat ka kuna kaba 30 hajar tyngka bad lada jia ba um lah ban siew ïa katei ka kuna ha ka por ba la buh, yn sa pynjlan biang ïa ka jingset phatok sa hynriew bnai kaba hap hapoh ka kyndon 5(1)/6 jong ka aiñ POCSO.
