Tura, Jylliew, 26: Ki nongïalam jong ka Trinamool Congress kiba kynthup ïa u Lazarus Sangma bad u Cherak W. Momin ki la leit jngoh ïa ki lanot kiba la mad ïa ki jingshah lynshop ha ki bor ka mariang ha rilum Garo.
Ka jingshlei um bad ki jingtwa khyndew na ka jingther jong u lapbah uba jur ka la ktah ïa phew hajar ki nongshong shnong ha kiba bun ki bynta jong ka Meghalaya, kat haduh ba ka la pynlong ïa ki paidbah nongshong shnong ba kin kyrduh ka bam ka dih bad sah ruh ha ki jaka kiba kham shngaiñ.
Kine ki arngut ki nongïalam ka TMC ki la leit noh ïa ki Chokpot bad ka Kharkutta bad ïakynduh ruh ïa ki lanot kiba la shah ktah ha ka jinglynshop ki bor ka mariang.
U MLA jong ka Chokpot u la lum jingkheiñ ruh ïa ki jingjulor ba la pynjot da ka mariang. Da dalade u la leit jngoh jingkieng Dagal Gopre Jangdam kaba la shah rah ha ka um ha ka jingshlei jong ka wah Kakija ha Chokpot, South Garo Hills.
Hadien kane, u la leit jngoh sa ïa ki longiing kiba la shah ktah ha ka jingshlei um ha ka shnong Mibonpara bad Durabanda Wangmagwi kiba hap hapoh ka Chokpot Constituency.
Ha kawei pat ka liang, u MDC ka Kharkutta u Cherak W. Momin u la leit jngoh ïa ki shnong bad ïa ki longing longsem kiba la shah ktah ha ka jingshlei um ha Kharkutta, North Garo Hills.
U la pynpaw ka jingsngewlem ïa ki longing kiba la shah ktah bad ïa ki longing kiba la duhnoh ïa la ki baieid bathoiñ ha ki jingtwa khyndew.
Une u MDC u la ai jingïarap ïa kine ki longing jong ki lanot ba la duhei ka jingim bad kyntu ruh ïa ki paidbah nongshong shnong jong ka jylla Meghalaya ban ïarap lem ïa kine ki lanot.
