Shillong, Rymphang 18 : Ka jingplie lad ban kamai kajih ïa ki longïing ha nongkyndong ha ka jylla ka la long ka bynta ba ka sorkar jylla ka phai khmat bha. Naduh u snem 2018, la lah ban aikam palat 500 ngut ki briew ha ka jylla man ka sngi hapoh 4 snem ba la lah haba nujor bad ki 4 snem ba la dep.
Shuh shuh la bei tyngka haduh 4,000 klur tyngka ban ai kam ha ki thaiñ nongkyndong hapoh ka MGNREGS ha kine ki 4 snem ba la dep. Ha kajuh ka por, la dep ban phah mar 13,600 tyngka sha kawei pa kawei ki longïing ha kine ki 4 snem ba la lah.
Ka jingjop jong ka MGNREGS ha ka jylla ka dei na ka daw ka rukom pyntreikam kaba pher ha ki shnong, ha kaba don ka Village Employment Council (VEC) ka ba la ïoh ïaka bor bad jingkitkhlieh ïa ka scheme. Tang ha une u snem ba la dep, palat 99 naka 100 ki briew kiba thep kyrteng ban ïoh ïa ki job card ki la dep ïoh ïa ka. Ki scheme kum ka MGNREGS ka la treikam bha ha ki jylla kum ha Meghalaya ha kaba palat 80 naka 100 na ki nongshong shnong ki shong ki sah ha ki thaiñ nongkyndong
Ka nuksa ba bha tam jong ka jingjop ka MGNREGS ka dei ka jingtei ban pynïeng ïa ka jngkieng kaba jrong 90 meter kaba pynïasnoh ïaka shnong Mawrah bad na ka shnong Kongthong ha ka jinglut kaba la kot 80 lak tyngka. La sdang ban tei ïa kane ka jingkieng ha u snem 2019 bad la pyndonkam 196 tylli ki job card ha ka jinglut kaba 50 lak tyngka kum ka bainong ki nongtrei. La pynwandur ïa kane ka jingkieng da ka jingstad ki engineer kiba na shnong bad kala long ka nuksa ba bha tam ba ha kano ka rukom ki nongtrei maw batbit ba na shnong ki la lahban pynieng ïa kum kane ka jingtei baitynnad.
Sa kawei pat ka jingtei ba pawnam ka dei halor ka jingpynneh ïaka um ha Ranikor ha kaba la tei 5 tylli ki jaka saitjaiñ, ki paiñkhana paidbah kaba lah ban ngiam haduh 20 ngut ki briew, ka jaka buh ïa ka um slap bad ka kor ban kham pynbha ïaka jingpyndonkam ïaka um ha ka rukkom ka ba dei. Nalor kane, ki nongshong shnong ki la pynlong ïaka program ban pynneh ïa ka umbam umdih da ka thung ïaki dieng ha shnong ha thaw.
Lyngba kine ki program, ka Meghalaya kala jam stet ban pynkylla dur ïaka thaiñ nongkyndong bad ban kyntiew ïaka kamai kajih ki briew. Lah ruh ban ong ba kaMeghalaya ka wan haka kyrdan ba ar ha ka ri ban ai bylla 100 sngi sha ki longïing ha nongkyndong.