Shillong, Rymphang 16: Ka Chief Secretary ka Jylla Kong RV Suchiang hyne ka sngi thohdieng, kala plie paidbah ïa ka Nationwide Emergency Response System (NERS)/Emergency Response Support System (ERSS) ne dial ‘112’ ban ai ka jingshakri ïa ki paid nongshongshnong ka Jylla haba don kino kino ki jingjia kiba donkam kyrkieh ïa ki jingshakri (Emergency Serevice) jong ki bor Sorkar.
Ïa kane ka project jong ka Ministry of Home Affairs (MHA) la plie ha Shillong Sadar Police Station bad ka dei na ka bynta ban ai jingshakri tang ïa ki nongshongshnong ba sah ha ki Nongbah jong ki Jylla bad Union Territories ka Ri.
Da ka jingplie ïa ka NERS/ERSS ne Dial ‘112’, naduh mynta baroh ki Emergency number kum ka 100 (police), 101 (Fire Service), 108 (Ambullance), 181 (Women & Child Care) kin long noh kawei hapoh u nombor ‘112’.
Ka jingpyntreikam ïa ka NERS/ERSS ka kynthup haduh lai bynta kata ka Public Safety Answering Point (PSAP) ba pyntreikam ha ki Nongbah jong ki Jylla, ki District Coordination Centre (DCC) kiba ïoh ruh ïa ki Emergency Response Units (ki kali ba pyndait ïa ki mobile data terminals) bad ka National Support Services (NSS) ba pyntreikam tang ha Nongbah Delhi.
Ka Tnad kam pohïing ka Jylla kala thied haduh 8 tylli ki Maruti Eco Van bad ka Sorkar kala ailad ïa ka Tnad ban shim wai ïa 12 tylli ki kali rit ba kin sdang pyntreikam ïa ka NERS. La ong ba baroh kine ki kali kin dei kiba la pyn dait ïa ki MDTs, First Aid Boxes bad ka Fire Extinguishers ba shiteng kilo.
Ïa kine ki kali la sam sha kylleng ki District ka Jylla ba kynthup ïa ka East Khasi Hills – 4 tylli, West Khasi Hills – 1, Ri Bhoi – 2, East Jaintia Hills – 1, West Jaintia Hills – 2, Eastern West Khasi Hills – 1, South West Khasi Hills – 1, North Garo Hills – 1, East Garo Hills – 2, West Garo Hills – 3, South West Garo Hills – 1 bad South Garo Hills – 1.
Nalor kine ki kali, la ong ba ki Highway Patrol Vehicle ne ki kali ba ïaid pahara ha ki National Highway kin dei ruh kiba pyndait ïa ki MDT bad kin treikam ruh kum ki Emergency Response Vehicles ha kaba kino kino ki briew kiba ïakynduh jingeh ha ki Highway ki lah ban phone ha u nombor 112. La pyntip ba ïa mynta ki don haduh 13 tylli ki Highway Patrol Vehicle hapoh ka Jylla.
Kiba la iadonlang ha kane ka sngi ki kynthup ïa i Kong I Nongrang Special Director General of Police, Meghalaya, Bah Cyris VD Diengdoh Secretary ka Tnad Home (Police) bad kiwei kiwei.