Tura, Jylliew, 26: U Deputy Commissioner, West Garo Hills, Tura u la pyntip ba ki la don ki briew kiba leit ban thok bad shukor ïa ki paidbah da kaba kular skim thok kylleng kylleng. La ong ba kine ki riew thok ki leit ban thok ïa ki briew da kaba pyndonkam da ki social media kum ki sms, da kaba phone, website, mobile apps lane ha kiwei kiwei ki rynsan kum ki facebook, Whatsapp, Instagram bad kiwei kiwei.
Kumta, halor kane na ka liang u Deputy Commissioner u la kyntu ïa ki paidbah ba ki dei ban long kiba husiar bad ïada ïalade da kaba kiar na kum kitei ki jingshah ïalam bakla.
La kyntu ïa baroh ba kim dei satia ban click lane nion ha kino kino ki jingthoh (link) kaba wan ha ki sms, e-mail, Facebook, Instagram, Whatsapp bad kiwei kiwei lada kim pat tikna naei wan ka jingthoh. La ong ruh ba kitei ki riewthok ki ju phah da ki jingthoh ne ki link kiba don da ki jingthoh khnang ba ki paidbah kin peit ne click bad lada ki leh kumta, kin sa ioh lut ban peit ïa ki message bad ruh ïa ki dur jong ki.
La kyntu ruh ïa ki ba kim dei satia ban download ïa kino kino ki apps da kaba pyndonkam da ki link kiba wan na shabar ne ki bym shisha hynrei lada ki kwah ki lah ban download beit na ki jaka ba shngaiñ. La kyntu ruh ruh ïa ki paidbah ba ki dei ban download beit ïa ki apps na Google Play Store lane na Apple Store ban ioh ïa ki apps ki bym don jingma ei ei. Shuh shuh la ong ruh ba ym dei satia ban ailad ne ai jingbit ïa ki apps ban peit ïa ki dur, ki video lane ïa ka jaka ba don haba install ïa kino kino ki apps.
La kyntu ruh ïa ki paidbah ba lada ki shem ïa kum kino kino ki jingeh ki lah ban call ha u National Helpline No. 1930.
