Shillong, Nailar 11: Ka Chibinang unit jong ka seng Federation of Khasi, Jaiñtia and Garo People (FKJGP) ka la pynpaw ïa ka jingeh kaba khraw ha kaba ïadei bad ka jingsniew palat ka surok National Highway 127B, kaba la tip kum ka AMPT Road ha kaba kane ka la wanrah ka jingeh ïa ki paidbah kiba hap ban mad ïa kane ka jingsyrtok.
Katkum ka jingïathuh jong ka seng la ong ba kane ka surok kadei kaba jngai kumba 30 km na Chibinang sha Rajabala bad ka la neh sah kaba sniew haduh kine ki sngi. Na ka liang ka seng ka la ong ruh ba wat hapdeng ki jingïai pynkynmaw ban pynbha ïa kane ka surok kam shym la long kam satia.
“Wat hapdeng ka jingïai mang ka pisa ban shna ïa ki surok kiba thymmai hynrei ki paidbah kin ïoh jingmyntoi tang shipor bad tang hapdeng katto katne ka por ka la jor biang bad kane dei ban kynthoh ïa ki kontraktor,” ong ka kyrwoh na ka seng.
Ka FKJGP ka la dawa ïa ka sorkar jylla ba kan buh noh da ka dak sniew ïa ki kontraktor kiba don ka jingkitkhlieh ha kaba ïadei bad kane ka jingsniew ki surok ha ka thaiñ, la ki dei kiba na jylla ne ki company kiba nabar, ha kaba kane kan ïarap ban ïoh ki rukom treikam kiba bha bad ban ïoh ruh ki jingmaramot ha ka por kaba dei.
