Shillong, Jylliew 26 : Ka Rangdajied United FC ka la pynliem da 1-0 pyrshah ïa ka Ryntih SC ha ka lympung ïalehkai OC Blue Shillong Premier League 2021-22 ha ka jingïakhun kaba la long ha ka sngi Saitjaiñ ha Third Ground, Polo, Shillong.
Kane kadei ruh ka jingïakhun ba khatduh jong ka second round.
U Donboklang Lyngdoh ka Rangdajied United FC u la thep ïa ka kol kaba stet tam jong kane ka samoi kata ha ka jingïalehkai ba dang ïaid sdan minit, hynrei watla hapdeng ka jingïalehkai kaba ïakhaid bad ïoh ki kabu pynban ka jingïakhun ka la neh da 1-0 haduh kaba kut.
Ka Ryntih ka la khur jingjop ha ka jingïakhun kaba nyngkong da kaba pynliem da 3-0 ïa ka Malki, katba ka Rangdajied United FC ka la ïakhaid da 1-1 bad ka Mawkhar.
Haba phai sha ka jingïalehkai, ka RUFC ka la sdang da kaba ñion shakhmat ka kut jong ka Ryntih, ha kaba u Chesterpaul Lyngdoh u la ïoh ban pynsmiej nyngkong ïa u Eric Nongkhlaw rangap kol ka Ryntih da kaba khyrwit sha kyndong jong ka jar.
Hadien shi minit ba la ïaid biang ka jingïalehkai, u Donboklang u la ïoh suk ïa ka bol ba la ai da ka Ryntih bad rah ïa ka bol shakhmat ha kaba u la ïoh ban pynrung suk ïa ka bol hapoh ka jar.
Ka Ryntih ka khlem duh mynsiem bad ïakhun beit triang ban pynphai kol. U Badon Kupar Marbaniang laisien u la ïoh ka kabu hynrei u khlem lah ban pynrung shapoh ka jar.
Ka jingïakhun ka la nang ïaid shakhmat, ka Rangdajied ka la sdang ban ñion biang shakhmat bad ïoh ruh ki kabu. U Chesterpaul uba la ïoh bat ïa ka bol u la rah beit shakhmat bad pashat sha u Donboklang uba la khyrwit ïa ka bol kaba la lait noh sharud bad sa shisien u Chesterpaul u la pyndei da ka khlieh hynrei ka bol ka la tam ïa u dieng kol.
Ka Ryntih ka la ïoh shibun ki kabu haba ïanujor bad ka Rangdajied ha ka jingïalehkai jong ka kyll step hynrei ka khlem lah pat ban pyndep ha ka liang ka thep kol.
Ki rangïalehkai ka RUFC ba kynthup ïa u Knerktilang Buam, Atlanson Kharmaw bad u Raikutshisha Buam kiba la ïoh ka kabu hynrei ki khlem lah pat ban thep kol. U Wanlamsuk Nongkhlaw ruh u la ïoh ban khyrwit tyngeh sha ka kol jong ka Ryntih hynrei la kyrda noh da u Restom Khriam rangïalehkai dien ka Ryntih sharud.
Hapdeng ka jingïalehkai kaba itynnad bad ïakhaid bha pynban haduh ba kut ka Rangdajied ka la khur ïa ki lai point da kaba pynliem da 1-0. Mynta ka sngi ka jingïakhun kan long hapdeng ka Mawlai pyrshah ïa ka Langsning.
