SHILLONG, Nailar 08: Ka Apex Councill jong ka Meghalaya Cricket Association ka la ïakynduh lang ha 07 tarik Nailar, 2025 ha ophis treikam jong ka MCA ha Polo.
Nalor kiwei kiwei ki mat kiba la ïakren ha kane ka jingïalang, ka Apex Councill ka la phaikhmat ruh ïa ki katto katne ki jingkynnoh ba khlem nongrim da u Divension Lyngdoh, u rangïalehkai kriket jong ka South West Khasi Hills District Cricket Association, uba la don ha ka thup jingpyrshang (trial) kaba nyngkong lane Phase 1 ban shah jied na ka bynta ka kynhun ïalehkai ba la rangbah jong ka Jylla.
Kumba la paw ha ki lad pathai khubor (prin & elektronik) ha ka 25 tarik Naitung, 2025, hadien ba u Divension u khlem shah jied ha ka thup kyrteng ba lyngkot na ka bynta ka Phase-II jong ka jingpyrshang jied lane ka trial, une u samla u la mih shakhmat ban kynthoh bad kynnoh pyrshah ïa ka Meghalaya Cricket Association.
Ka jingïalang ka ñiew bad shim ba kum kine ki jingkynthoh ka thew beit beit sha ka jingbym sngew-tynnad bad kaba la shu ïaleh jubor ban ïada ïa ka jingbym lah ban paw bha ha ka prokram pyrshang (trial), ha kaba kum u rangïalehkai un jin da la kut jingmut ban aiti met bad mynsiem ban kilanmet khnang ba un shah jied ha ka kynhun.
Shuh shuh, ha kane ka jingïalang jong ka Apex Council, kampher wat lada na ka liang jong u Divension Lyngdoh u la wan shakhmat ban panmap ïa ka jingkren bad kynthoh ka jong u, hynrei ynda haba la pynshong nongrim bha, kaei kaba u la leh bad thad ha ki lad pathai khubor, ki lam beit sha ka kam pynjah burom, kaba ka lah ban wanrah pynban ïa ka jingïapher jingmut ïa ka jingïadei kaba jan jong ki synjuk ïalehkain kriket ki District, ki nongpynïaid, ki nongjied ïa ki player.
Nalor katta kum kine ki jait jingkynthoh ka pynsuba sniew ruh wat ïa ka jingjied ïa ka kynhun ba la bynshet ha ka Selection Committee jong ka MCA, kaba jied ïa ki nongïalehkai da kaba pyndonkam ïa ki kor ki bor ban shim jingkheiñ ïa uwei pa uwei u rangïalehkai ha ka trial, khnang ban pyntikna ba kan long kaba biang, kaba khuid ba suba bad bym don dak eiei.
Kumjuh ka jingïalang ka la pynpaw bad ïai ban ba ha kane ka kynti kaba mynta, ka rukom jied ïa ki rangïalehkai ka dang long kaba janai bad kaba bñiah bha, kaba da wan kum kine ki jait jingkynnoh ki long ki bym lah ban pdiang bad bym don nongrim, hynrei kaba wanrah ïa ka jingbym sngewtynnat namar ka jingbym lah ban ïalehkai bha da u rangïalehkai.
Kumta ka jingïalang jong ka Apex Council, ka la shim ïa ka rai ba kum kine ki jingkynthoh bad jingkynnoh ki bym lah ban pynshisha, la ñiew bad shim kum ka jingthmu ban pynbud nam bad ban pynjah burom da u rangïalehkai, ka thew bad lam sha ka baroh ka jingbym long ryntih (discipline) jong u.
