Nongpoh, Nailar 07: Ki pulit ka Ri-Bhoi hynnin ka janmiet ki la ïoh ban kem ïa uwei u briew bala tip kyrteng kum u Sirajul Haque (36) na Barpeta Assam hadien ka jingïoh jingtip ba utei u briew u thmu ban shalan drok.
Hadien ka jingïoh jingtip kaba bñiah, ki pulit ki la pynlong ka jingpynap shrip bad ïoh bat ïa kawei ka scooty kaba don ïa u number ML 10 C 4833 bad ha ka jingtalasi ki pulit ki la ïoh ban kurup ïa u drok heroine ba khia kumba 49.44 gram bala thep ha 5 tylli ki synduk sabon.
Na ka liang ki pulit hadien ka jingïoh kurup drok ki la kem noh ïa u Sirajul bad register mukotduma katkum ka NDPS Act bad ka jingtohkit mynta ka dang ïaid shakhmat.
Ha kajuh ka sngi na ka liang ki pulit ka Byrnihat ki la ïoh ban kurup 2.47 kilo u kynja na kawei ka Maruti Car kaba don ïa u number ML 10 C 3646 bad ki pulit ki la ïoh ban kem 2 ngut ki briew ba don ha katei ka kali ba kynthup ïa u Franky Marsing (27) bad u Shan Sylliang (24) na ka shnong Iewmawlong Nongpoh hadien ba ki thmu ban phah ïa utei u kynja sha Chennai bad na ka liang ki pulit ki la register mukotduma katkum ka NDPS Act bad ka jingtohkit halor katei ka jingjia ka dang ïaid shakhmat.
