Shillong, Nailar 07: Ka NorthEast United FC, kaba bat ïa ka nam lahduh kan ïakhun pyrshah ïa ka kynhun kaba wan hakhlieh duh mynta ha ka Group E ka Shillong Lajong FC ha ka jingïakhun ‘Northeast Derby’ ha kane ka sngi Thodieng (08 tarik u Nailar 2025) jong ka 134th IndianOil Durand Cup 2025 ha Jawaharlal Nehru Stadium, Shillong.
Ka Shillong Lajong FC kan kyrmen ban bteng ïa ka jingjop ba paka jong ki ha ka Group pyrshah ïa ka Northeast United FC, ha ka jingïalehkai Northeast Derby kaba la khmihlynti ban long ka jingïakhun kaba jur bha namar baroh ar kin ïaknieh ban ïalam nakhmat ha ka Group E bad ban pynthikna ïa ka jaka ha ka wat ïakhun knock out.
Ka Shillong Lajong ka la sdang da kaba baroh jop ar sien lynter ki jingïalehkai hadien ba ka la pynliem da 6-0 kol ïa ka Malaysian Armed Forces FT, bud sa ka jingjop kaba 3-1 kol ha ka jingïalehkai Shillong Derby pyrshah ïa ka Rangdajied United FC.
Ki rangïalehkai trai jylla ba kynsai kiba ïalam hakhmat ki kynthup ïa u Phrangki Buam, Mylliempdah bad u Lyngdoh, kaba pynlong ïa ki jingïalehkai hala ïing kaba itynnad hapoh ka jingïalam jong u Coach ba thymmai u Birendra Thapa. Ka Lajong kan khmihlynti ruh ban kput ïa ka jingshah rem kaba 3-0 kol ba ka la mad ha ka semifinal jong ka samoi ba ladep.
“Ki jingïalehkai Derby ki long barabor kiba kyrpang, bad kane kam ïapher bad kiwei pat. Nga la pynkhreh bha, bad ki rangïalehkai ki la khreh bha ban aiti lut baroh. Ka jingïakhun ka long kaba jur bha, hynrei ka thong jong Ngi ka sah kumjuh ban bat skhem ïa ka jingthmu jong Ngi bad ban pyntreikam ïa ka ha ka rukom kaba janai,” la ong u coach ka Lajong u Birendra Thapa.
Ka NorthEast United FC, kaba bat ïa ka nam lahduh, ka rung ha kane ka lympung da ka jingmut kaba skhem hadien ba ka la rah ïa ka nam lahduh ha u snem ba la dep, kaba kynthup ïa saw tylli ki jingïalehkai khlem da shah thep (clean sheet).
Mynta ka samoi ka NEUFC ka la sdang da ka jingjop kaba 3-1 kol ïa ka Malaysian Armed Forces FT bad ka i skhem ban pynjlan biang ïa jingjop ha kane ka Durand Cup kaba mynta. Ka NEUFC ka la pynneh kumjuh ïa ki rangïalehkai ba shakhmat jong ka naduh u snem ba la dep bad ka don ïa ka kynhun kaba khleh lang ïa ki sap ba kynsai ha ka ISL bad ki samla kiba sdang paw.
“Kadei ka Northeast Derby, bad ki jingïalehkai derby ki long barabor kiba kyrpang bad kiba jwat. Ngi tip bha ïa ka Shillong Lajong FC, bad ki ruh ki tip kham bha ïa Ngi. Na ka bynta jong Ngi, kane ka dei kawei pat ka jingïakhun. Kan nym long ka jingïalehkai kaba suk, hynrei Ngi long ba la pynkhreh,” la ong u Juan Pedro Benali, Head Coach jong ka NorthEast United FC.
Baroh ki jingïalehkai jong ka 134th IndianOil Durand Cup la pyni LIVE ha ka Sony Sports Network (Sony Ten 2 HD) bad ruh ha ka SonyLIV.
