Mawkyrwat, ‘Nailar 06: Kawei ka jingjia kaba la jia ha kine ki khyndiat sngi ha kaba uwei u samla uba dang ha ki karta 21 snem ei ei ula jah rngai na ïing jong u na Domthrin-Mawten, South West Khasi Hills District, Mawkyrwat naduh ka 2 tarik ‘Nailar, 2025.
Kumta ha ka kyrwoh na u Superintendent jong ki Pulit ka South West Khasi Hills District ka ong ba mynta ka sngi ka 06/08/2025 ha ka por 9 baje mynstep ei ei, na ka liang ki pulit ki la ïoh pdiang ïa ka kaiphot ba jah na u Droswell Lyngkhoi ha kaba ïadei bad u khun jong u, u bah Kyrshanbok Marngar (21 snem), uba la jah rngai na Domthrin-Mawten, South West Khasi Hills District, Mawkyrwat naduh ka 2 tarik ‘Nailar, 2025.
Shuh shuh hadien kata, ha ka por 10:20 baje mynstep la ïoh jingtip halor kawei ka met ïap bym lah ban ithuh ha Wah Umngi, Pongkung kaba hap ha ka East Khasi Hills District ba ka per ha rud um.
Kumta mar mar na ka liang kiba haïing hasem ki la leit ban pynthikna, ba katei ka met ïap ka dei jong u Kyrshanbok Marngar, 21 snem karta na Domthrin-Mawten.
Hadienkata, la ong ruh ba u Officer Incharge jong ka Mawsynram Police Station u dang pyndep ïa ki kam, bad ïa ka met yn aiti sha kiba ha ïing ha sem hadien ba la dep ïa ki rukom treikam.
