Shillong, Nailar 05: U Bah Copperfield Lyngdoh Kynshi u la phah ka jingujor ba ha ka step jong ka 2 tarik mynta u bnai ki runar bym lah ban ithuh ki la tuh ïa ka thuk thuk jong u kaba don u nombar ML-05AB-9020 napoh ka ïing sah jong u kaba ha Mawlai Mawdatbaki Umparmaw, Shillong.
Ha kawei pat ka jingjia ka samla A Mawthoh ka la phah ka jingujor ba hapdeng ka mied jong ka 1 & 2 tarik mynta u bnai, ki runar bym lah ban ithuh ki la tuh ïa ka scooter kaba don u nombar ML-05X-8033 na Umkdait Nongmensong, Shillong.
Na ka liang ki pulit ki la ïathuh ba ha ka 3 tarik mynta u bnai ki la ïoh ban bat ïa u Charlie Pyngrope bad kham hadien une u briew u la phla ba u la tuh ïa ka bicycle na Umpling Lumdiengmet bad u la die ha Demseiñïong, Shillong. Kham hadien pat ïa kane ka bicycle la shem na kawei ka longkmie T Malngiang bad la aiti sha u trai kane ka bicycle.
Ha kawei pat ka jingjia u Prashant Soni u la phah ka jingujor ba ha ka 3 tarik mynta u bnai ba ki la don ki runar bym lah ban ithuh ki la tuh ïa ka thuk thuk kaba don u nombar DL-11H-2358 najan ISBT Mawiong, Shillong By-Pass.
Shuh shuh na ka liang ki pulit ki la ïathuh ba u Kenton Ch Marak u la phah ka jingujor ba ha ka 30 tarik u Naitung ha ka por 11 baje mynmiet, ka thuk thuk jong u kaba don u nombar ML-08F-2415 la shem ba ka la jah na ka ïingsah jong u kaba Nawalgre, Tura (WGH).
Ha kawei pat ka liang ki pulit ki la ïoh jingtip ba ha ka miet jong ka 1 tarik mynta u bnai ki sengbhalang ka Garobadha area (WGH) ki la ïoh bat ïa kawei ka kali Bolero pick-up, kaba la kynnoh ba ka la kit ïa ki dieng jri bad ïa kane ka kali la aiti noh sha ki pulit.
U Bah Shanskhemlang Syiemlieh u la phah ka jingujor ba ha ka miet jong ka 2 tarik mynta u bnai ki runar bym lah ban ithuh ki la tuh ïa ka scooter jong u kaba don u nombar ML-05AD-0439 na Umpling, Shillong.
