Shillong, Jylliew 25 : U Myntri ka tnad Pule Puthi ka sorkar jylla, Bah Lahkmen Rymbui u la kyntu ïa ki kynhun niam ba kin shim ïa ka bynta kaba kongsan ha kaban wanrah ïa ka rukom jied ïa ki nongmihkhmat ha ka jylla.
“Ka kamram jong ki Balang bad ki jaka jong ki kynhun niam ki don ka bynta kaba khraw ban pynsngewthuh halor ka sainpyrthei ha ka jylla. Baroh ki ïakren kumno ka bor pisa kan treikam borbah ha ka elekshon ban wan bad kumno ki kynhun niam ki don ka bynta kaba khraw ban pynsngewthuh kumno ban jied ïa ki nongmihkhmat kiban san wan,” ong u Bah Rymbui haba kren ha ka jingïalang plie ïa jingdap 100 snem jong ka Balang Unitarian ha Nongthymmai.
“Ki Balang bad ki jaka treikam jong ki kynhun niam ki dei ban pynsngewthuh ïa ki dkhot bad ïatai paidbah khnang ba kin ïohi uba kumno u kyrtong uba lah ban noh synñiang kham bun ïa ka imlang sahlang bad ïa ka jylla,” u la bynrap biang.
Utei u Myntri u la ong ruh ba bun ki nongmihkhmat paidbah mynta kim sngewtynnad shuh ïa ka rukom long ka rukom jied nongmihkhmat kaba wan ha ka jylla mynta.
“Ngi dei ban kylli kaei ba ka imlang sahlang ka kwah nangne shakhmat. Kine ki jaka treikam jong ki kynhun niam ki dei ruh ban plie lad ban ïatai kaba kumno ki nongmihkhmat MLA ne MDC ba ki lah ban leh na ka bynta ka jylla ym ban ïakren katno ka pisa u kyrtong u don,” bynrap biang u Bah Rymbui ha katei ka jingïalang kaba la wan ban shim bynta da bun bha ki nongmihkhmat na ki kynhun niam bapher bapher.
Ha shwa kane, na ka liang u MP ka Lok Sabha kumjuh ruh u MLA ka thaiñ Bah Charles Pyngrope ki la kren ha katei ka sngi haba ïadei bad ka jingnoh synñiang jong ka Balang ha Khasi Jaintia naduh ba seng ïa ka da u Babu Hajom Kissor Singh Nongbri ha u 1887.
Ha kane ka sngi, na ka liang u Rev Derric P Pariat ba dei u Nongsharai Balang jong ka Unitarian Union of North East India u la ai ka jingbatai kaba bniah halor ka Balang Unitariam ha Nongthymmai bad pynkynmaw ruh ïa ka jingnoh synniang jongki arngut ki longkmie ba seng ïa ka, kata i Kong Jylla Kharbithai bad i Kong Yen Nongkhlaw nalor kiwei kiwei.
