Long kiba leh khuid haba die ïa ki marbam harud surok, Asst. FC

0

Shillong, Jylliew, 24: Ka Assistant Food Commissioner ka Kong DBS Mukhim ka la kyntu ïa ki nongdie madan dei ban long kiba leh khuid haba ki die ïa ki marbam harud surok.
Ka Kong Mukhim ka la kyntu ïa ki nongdie madan ha ka jingïakynduh lang jong ki nongdie madan kiba don hapoh ka shatri jong ka Meghalaya & Greater Shillong Progressive Hawkers and Street Vendors Association (MGSPHSVA) kiba la rakhe ïa ka lyngkhuh snem kaba hynriew kaba la long ha Anton Hall, Laitumkhrah, Shillong ha ka sngi Palei.
Ka la ban jur ïa ki nongdie madan bad khamtam kiba die jingbam ba ki dei leh khuid leh suba bad tap bha ïa ki jingbam jong ki. Ka la pyrto ruh ïa ka MGSPHSVA kaba ju ïatreilang bad ka ophis na ka por sha ka por.
Na ka liang jong ki nongïalam ka MGSPHSVA ki la ai burom ïa ka Kong Mukhim bad la mana ruh ïa ki dkhot bad ïa ki nongdie madan ba kim bit ban kren tohmet ïa ki Nongmihkhmat jong ka Sorkar haba ki kyntu bad pyni ïa ki kyndon ba ki nongdie madan ki dei ban bud.
Ka Kong Wanpynhun kaba ju trei na ka bynta ka bha ka miat jong ki kynthei kiba im kamai bylla ja kpoh, haba kren kum ka Symbud Kongsan ka la pynkynmaw ïa ki hok jong ki nongtrei nong bylla kaba kynthup ruh ïa ki nongdie madan.
Ki mat kiba ka Kong Kharsyntiew ka la pynkynmaw ka long halor ka koit ka khiah, ka sumar pang, ka pule dangle, ka bai bam tymmen, ka Ration Card bad kiwei kiwei.
“Kine ki dei ki hok tynrai jong ki nongshong shnong,” ka la ban jur bad bynrap ba kum ki nongshong shnong bapura ki dei ban mih shakhmat ban dawa ïa la ka jong ka hok.
Da ki phew spah ngut ki dkhot jong ka MGSPHSVA ki la ïashim bynta ha kane ka sngi bad ha kane ka jinglehkmen la pynbyrngia da ki prokram bapher bapher bad la pynlong ruh ïa ka jingïakop pyni sap.
Shwa ban pynkut ïa ka jingrakhe la sam ïa ki khusnam sha ki nongjop ha kine ki jingïakop.
Kane ka jingrakhe lyngkhuh snem mynta u snem ka long kaba kyrpang namar ka ïahap bad ka jingjop jong ki nongdie madan ha ka jingïakhun mukutduma jong ki na ka bynta ban pyntreikam ïa ka Central Act halor ki nongdie madan.
Ka Seng ka ai khublei ïa ki Muktiar kiba kynthup ïa u Kastav Paul bad ki nongïarap jong u bad ïa u Phiyo Yobin bad ka kynhun jong u.
Shwa kane, ka seng ka la ai jinghikai halor ki jingpynïaid ïa ki kam jong ka Seng, ki jingtip shaphang ki Aiñ bad kumno ban ïatreikam ha ka imlang sahlang ba la ai jingkren da u Dr. Sunil Kaul na ka Indian Public Health Foundation.

Leave A Reply

Your email address will not be published.