Sniew palat ki jingbam surok, da ki khynnah skul hikai ka Food Safety ban lap ïa ki jingbam basniew

Shillong, Naitung 31 : Ka tnad Food Safety jong ka jylla ha ka step sngi Palei ka la pynlong da ka jingai jinghikai bad ka jingpynshai paidbah lyngba ki khynnah skul jong ka Army Public School kaba don ha Happy Valley ban ithuh ïa kino ki jait jingbam lane ki marbam kiba la sniew bad kiba dang bha.
Hapoh ka jingïalam jong ka Assistant Commissioner ka Food Safety Kong DBS Mukhim, ki khynnah ki la lah ruh ban batai kylla sha ki paidbah kumno ban test bad kumno ban ithuh ïa ki jait jingbam kiba la khleh bad ruh ban lap ïa ki jingbam kiba la sniew.
Ka Assistant Commissioner ka la pynshai ruh ïa ki khynnah skul halor ka rukom bam kaba koit kaba khiah bad ba kiar lailum laiwah na ki jingbam khutia ne ki jingbam surok kum ki alumuri bad kiwei kiwei namar kine ki long ka daw tynrai kiba wanrah ïa ki jait jingpang ba harukom.
“Ka jingbam ïa kine ki jingbam khutia ne ki junk food) ka lah ban wanrah ïa ka jingsngaid ka bym koit bym khiah. Phi la ïohi kumno la hikai ïa kine ki khynnah skul kumno ba kin test ha iing ban lap ïa ki marbam kiba la sniew,” ong i Kong DBS Mukhim, Assistant Commissioner of Food Safety
Haba batai bniah shaphang ki jingbam khutia ba shet ha ki rud ki kiar, i la ong ba kine ki jait jingbam ki lah ban wanrah shibun ki jait jingpang kum ka diabetes, ka hypertension, ka heart attach bad kumta ter ter.
I la ong ruh ba ïa kine ki jait jingbam la khleh bun bha ki kynja shini bad shibun ka mluh nalor ba la shet ia ka ha ka umphniang kaba lehse kam dei shuh kaba dang khuid.
“Kumta kane ka wanrah ka jingeh ïa ka koit ka khiah jong ki paidbah. Kine kidei ki jingpynshai kiba ngi wanrah ban pynsngewthuh ïa ki khynnah skul mynta ka sngi.”
I la ong ruh ba lyngba kane ka prokram kin wad pat ïa ki khynnah kiba donsap ban ai jinghikai kylla pat ïa ki paidbah kiba ju khot kum ki young ambassador of food safety jong ka jylla Meghalaya.
Nangta i ong ba hadien ba la dep na katei ka sngi ha kane ka sngi mynta pat kin leit kylleng ki distrik ban pynshai halor kane kajuh ka phang. I la ong ruh ba kane ka dei ka thong ban pyndep la kumno kumno ar tylli ki skul sorkar ha kawei kawei ka distrik ban ai jinghikai ne ban pynshai.
Ha kane ka sngi, la hikai ruh ïa ki kumno ban test ïa u sohmrit uba thied na iew khnang ban tip ba ha ka song u dei tang u sohmrit ne ïoh dei uba la dep khleh.
I la batai ruh ba ka long kaba suk bha ban tip ïa kane namar donkam tang ban shim ïa utei u sohmrit ba don ha ka sop bad theh ha i kynja jingdiang ne ka klat bad sa theh da ka um bad king pat.
Shuh shuh i la ong ba u sohmrit ba shisha u hiar lut sha trai ka klat katba uba per pat ha jrong um dei satia u sohmrit hynrei u dei u shyieng sohkymphor.
“Ka jingshah thok kaba nyngkong jongngi hangne ka long ba ngi shah thok ha ka dor ha ka mur. Ngi siew ha ka dor jong u sohmrit hynrei ngi ïoh lang pat ai u shyieng sohkymphor,” i la ong da kaba bynrap ba dei kane kaba ki ju tip ba kadei kaba shah thok ha ka dor bad ruh ha ka marbam.
Nangta i ong ruh ba ha ka bynta kaba ar, ki paidbah lehse ki lah ban ong ba u sohkymphor u dei uba bha ban bam lane u sohmrit uba bha ban bam bad ba kam don jingma ei ei. “Hynrei kane ruh kam dei satia kaba biang,” i la ong.
Ha kajuh ka por i la batai ruh shaphang ka jingpyndonkam ïa u masala ba ju pyndonkam haba shet jingshet bad theh ha ki bowl. “Phi lah ban thied ïa ka Iodine Solution nangta phi lah ban theh khyndiat ïa ka hajrong uto u masala. Lada uto u masala u kylla rong blue ha ka rong, kata ka mut ba um dei satia uba shngain ban pyndonkam namar u dei uba la khleh,” i la batai pynshai shuh shuh.
Na ka liang jong i, i ong ruh ba ki paidbah ki dei ban long kiba husiar bad peitngor ïa ka bam ka dih na ka bynta ka jingkoit jingkhiah.