Nongpoh, Naitung 30: Ka Khasi Students’ Union (KSU) North Khasi Hills District hapoh ka jingïalam u Samla Ferdinald Kharkamni kum u President bad u Samla James Mawphniang General Secretary, lem bad kiwei ki dkhot ka seng, mynta ka sngi ki la leit ban ïa kynduh ïa u Chancellor ka University of Science and Technology, Meghalaya (USTM), u M. Hoque. Kane ka jingïakynduh ka dei ban pynkynmaw ïa ka jingïatreilang kaba la neh lypa hapdeng ka seng bad katei ka skulbah na ka bynta ka bha ka miat jong ki samla pule Khasi.
Ha kane ka jingïakynduh jong ka seng, kala lah ban pynsngew hakhmat u Chancellor halor ka jingdon jong ki samla pule kiba stad ha ka pule puthi hynrei ki bym lah ban bteng namar ka jingduk. Hadien ka jingïalang, u Chancellor u la mynjur ban ai jingiarap ïa 12 ngut ki samla pule na ki longing ba duk ba rangli, kiba la shah jied ban pule ei ha ka kyrdan Under Graduate khlem da siew ei ei.
Haba kren sha ki lad pathai khubor, u Samla Ferdinald Kharkamni u la ong ba kane ka jingiatreilang hapdeng ka KSU bad ka USTM ka la sdang naduh u snem 2019, bad ka seng ka la shimkhia bha ïa kane ka kam ban kyntiew ïa ki samla Khasi ha ka liang ka pule puthi. U la pynpaw ruh ka jingsngewkmen halor ka jingjop ban pynrung ïa kine ki 12 ngut ha katei ka skulbah.
Ka seng KSU ka la pynsngew ruh halor ka jingdonkam ban ai lad sha kiwei pat ki samla pule kiba kwah ban bteng ïa ka Postgraduate bad khamtam ban ai lad sha ki samla ka jylla ban rung ha ka tnad MBBS. Kane ka jingïalang ka la ai jingkyrmen ba ha ki sngi ban wan, kin dang bun ki samla Khasi kiba lah ban ioh jingmyntoi na ka jingïatreilang ka KSU bad ka USTM.
Shuh shuh naka liang ka KSU kala maham ruh ïaki briew naka jylla Assam kiba ju pynthohbria bad pyndik naka por sha ka por kiba ju mlien ban leh politik bad leh business ïa katei ka skulbah kaba ai jingmyntoi bad shakri ïakiba bun ki samla ka jylla bad wat nabar ka jylla.
Ha katei ka juh ka sngi ka seng KSU kala ioh ruh ban ïakren bad kyntu ïa u Chancellor ka USTM bad ki bor pynïaid ba dei ban pyndonkam noh da ka jaiñ ryndia ha kino kino ki jingïalang ne ka jingpynkup burom ha katei ka skulbah ban pynneh pynsah bad kyntiew ïaki jaiñ tynrai ba mih na kane ka district kumba katei ka skulbah ka don ha Ri-Bhoi District jong ka jylla Meghalaya namar kumba long mynta katei ka skulbah ka ju pyndonkam da ki jaiñ na jylla Assam.
