Haduh 66 ngut, ïoh jingmyntoi kiba don jingduna haki dkhot met ha West Jaiñtia Hills

Jowai, Naitung 26: Haduh 66 ngut kiba don jingduna ha ki dkhot met hapoh ka West Jaiñtia Hills District kila ïoh jingïarap mynta ka sngi saitjaiñ haka prokram bala pynlong daka ophis District Social Welfare Officer, ki bor pynïaid District ka WJHs bad ka Composite Regional Centre for Skill Development Rehabilitation Empowerment of Persons with Disabilities (Divyangjan) CRCSRE, Shillong.
Ïa kane ka prokram la pynlong ha Lad Mukhla Community Hall, West Jaiñtia Hills District, shi bynta ban kner ïa ki lad jingïarap sha ki briew ba don jingduna kiba kynthup 29 ngut la sam da ki tiar kum ki wheelchairs, crutches bad ki tiar jingdeng ban ïoh sngew, katba ïa ki 37 ngut la sam jingïarap da ka Niramaya Health Insurance Cards.
U Symbud Myntri Rangbah ka jylla u ma Sniawbhalang Dhar ula wan ban ïadonlang ha kane ka sngi kum u kongsan haka jingdonlang u ma Wailadmiki Shylla Jowai MLA cum Chairman MUDA, u Deputy Commissioner ka WJHD u Abhinav Kumar Singh, IAS, u Dr. Ram Shakal Sahani, Director of CRCSRE, Shilong bad ka kong Y. Najiar, District Social Welfare Officer.
U ma Sniawbhalang Dhar haba ai jingkren ula ai mynsiem ïa kitei kiba don jingduna ha ki dkhot met da kaba ong ba kin ïaleh ban bud ryntih ïa ki jingpynbeit ka sorkar khanng ban ïoh ïa ki jingmyntoi na ka skim jong ka sorkar. Ula pynsngew halor ka jingdonkam jong u Aadhaar Card na ka bynta ki skim bapher bapher.
Ula ong wat na ka liang ka sorkar ka ai jingkyrshan ba pura ïa ki briew kiba don jingduna ha ki dkhot met. Ha ka juh ka por ki kyntu ba kin pyndonkam bad sumar bha ïa kitei ki tiar kiba la sam bad ban long ki briew kiba don jingkyrmen ha ka jingim, ula ai mynsiem ba kin bteng ïa ka jingpule ba shakhmat ryngkat ka jingkyrshan ka sorkar.
U ma Sniawbha ula kyntu ïa ki ba kin leit mih manka por sha ka District Social Welfare Officer lane ïakynduh ïa ki ophisar ba dei peit khnnag ban ïoh jingtip khambniah shaphang ki skim na ka bynta jong ki.
Kiwei de kiba ai jingkren ki kynthup ïa u MLA ma Wailadmiki Shylla, u Deputy Commissioner ka District u Abhinav Kumar Singh kiba ai jingkyntu ïa ki ban long kiba laidluid bad kiba pyndonkam hok ïa ki skim kiba la buh kyrpang na ka sorkar, ha ka juh ka por la khublei ruh ïa kane ka tnad sorkar kaba la trei shitom na ka bynta ka jong ki.
U Dr. Ram Shakal Sahani, Director of CRCSRE, Shilong ula pynsngew halor ka rukom treikam na ka bynta kiba don jingduna ha ki dkhot met kaba la sdang hapoh ka West Jaiñtia Hills District naduh ka April 2025 da ka jingïalam u Deputy Commissioner lyngba ka camp haka 16th April, 2025 ha kaba haduh 250 ngut kiba la ïoh jingmyntoi.
Ïa ka jingïalang ha kane ka sngi la pynïaid da u H.Laloo, Supervisor, Social Welfare Department, Jowai katba ïa ki kyntien ai khublei la ïoh na u ma M.Thabah, CBRW, Social Welfare Department, Jowai.