Nongpoh, Naitung 24: Ban pyrshah halor ka jingwan rung kyrthep ki bar jylla da kaba shim kabu ha ki kam bylla sha kane ka jylla, ka KSU Kyrdemkulai 5km Unit ka la pynher krad ïa bun ngut ki bar jylla kiba la wan poi sha katei ka thain na ka bynta ban leit bsuh khlieh ha ki kam bylla sngi.
Kumba 7 ngut ki bar jylla ki la shah pynher krad ha ka KSU, hadien ba ka KSU ka lap ba ki thmu ban leit bylla sngi sha ka thaiñ Kyrdemkulai bad kane ka jingpynher krad ka seng ïa kitei ki bar jylla ruh ka dei hadien ba kim don satia ïa ki kot ki sla kiba biang.
Kumba la pyntip da u Richard Lyngdoh Nonglait, Publicity Secretary ka KSU NKHD, la ong ba ki nongïalam ka KSU Kyrdemkulai 5km Unit, ha ka jingïalam u Vice President u Samla Elisha Lyngdoh Marshilong lem bad kiwei ki dkhot tang mar ïa ïoh jingtip ki la leit ban bat ïa kitei ki bar jylla ban pan ïa ki kot ki sla bad namar ba ba kim lah ban pynshisha lyngba ki kot ki sla ka seng ka la beh krad noh khlem da ailad ban rung sha ka thaiñ Kyrdemkulai.
Halor kine ki jingwan rung mon ki bar jylla sha ka jylla, ka KSU Kyrdemkulai 5 KM Unit, ka la maham jur ïa kino kino kiba ju wan rah nongbylla da ki bar jylla da kaba shuh pynrung jubor sha ka jylla bad kum ka seng ka la maham ruh ba lada ka dang lap nangne shakhmat kan nym ailad bad kan leh da ki kam kiba tyngeh, u la bynrap.
