Jur ka jinglip bording ha Ri-Bhoi, ka District Library tang ka shynrong, pynsngew ka FKJGP h’u DC

Nongpoh, Naitung, 23: Ki nongïalam ka Federation of Khasi Jaintia and Garo People, North Khasi Hills District hapoh ka jingïalam u Samla Ricky Majaw General Secretary ryngkat bad ki dkhot mynta ka sngi ki la leit ban ïakynduh syndon ïa u Deputy Commissioner ka Ri-Bhoi District ban ujor bad aiti syndon da ka dorkhas namar ka jinglip khah khah palat jong ka bording elektrik ha bun ki bynta jong ka Ri-Bhoi District khamtam ki thaiñ nongkyndong kaba la ktah shi katdei ïa ka kam ka jam jong ki paidbah, ki samla pule bad wat ki jaka treikam bapher bapher.
Haba kren sha ki lad pathai khubor hadien ka jingleit kynduh ïa u Deputy Commissioner ka Ri-Bhoi, u Samla Ricky Majaw ha ka jingdonlang ki dkhot u la ong ba ka daw ba la pynlong ïa ki nongïalam ka seng ban leit kynduh bad ujor sha u DC ka dei namar ka jingshah ktah palat jong ki paidbah na ka jingthud ka bording elektrik ha ka dong Ri Bhoi baroh kawei namar kumba la sakhi da ki paidbah lada slap tang khyndiat ruh lip, lada rang ruh lip, lada beh lyer ruh lip bad ki paidbah kim ioh ban pyndonkam thikna.
Ha kajuh ka por na ka liang ka seng ka la pynsngew ruh sha u DC halor ka jingdon jong ka District Library ha Nongpoh kaba long tang kum ka shynrong ha ka jaka ban long ka jingmyntoi ïa ki khun samla ba kin ioh ban pule kot, pynban katei ka Library kam pat long kaba biang bad ki nongtrei ki duna bad ha ka jingleit jurip ka seng ka la lap ruh ba katei ka Library kam pat long eiei haba nujor bad kiwei kiwei kiba don sha kiwei ki district.
Ha kaba ïadei bad kitei ki mat ba ka seng ka la rah hakhmat u DC na ka liang u DC u la kular ban shimkhia ban lum ruh ïa ki ophisar jong ka tnad bording na ka bynta ban pynthikna ba ki paidbah kim dei ban shah ktah palat bad ha kajuh ka por ban shimkhia ruh ban nang pynbha bad pynjanai ïa ka District Library na ka bynta ka jingmyntoi ki khun samla ka district.