Kynnoh ki nongñiah trok ba hap siew pisa 200-500 ha 16 tylli ki khyrdop khrong pisa ha Ri-Bhoi

Nongpoh, Naitung, 22: Ka kynhun jong ki trai bad nongñiah trok hapoh ka shatri jong ka Meghalaya Commercial Truck Owners and Drivers Association, hapoh ka jingïalam u Bah Mosklandar Marngar President, Bah Wanshuwa Nongtdu Spokesperson bad u Bah Peter Marbañiang General Secretary, ryngkat kiwei pat ki dkhot, mynta ka sngi ki la leit ban ïa kynduh syndon ïa u Deputy Commissioner ka Ri-Bhoi District, u Abhilash Baranwal hadien ka jingkhot ïa kren jong u ha kaba ïadei bad ka jingkhrong pisa ki 16 tylli ki khyrdop kiba don ha Ri-Bhoi District na ki nongñiah trok bad wat ki kali trai muluk.
Haba kren sha ki lad pathai khubor hadien ka jingleit kynduh ïa u Deputy Commissioner, u Bah Mosklandar Marngar President u la ong ba ngim kwah ba kane ka kam kan long political issue namar kane shisha ka jingeh jong ki nongñiah trok bad ka jingïakhun kam dei kaba tang mynta, hynrei kaba la slem namar bun ki khyrdop lum pisa ki dei kiba ai bor da ka district council, naduh 2019 naduh ba lamkhmat da ka UDP ïa ka council ka la don ka jingïakhun thma bad kaba sngewsih ba ki la don ki dkhot kiba poi wat haduh ICU ban shah sumar, hynrei hadien ka jingwan jong ka NPP ka jingïakhun ka dang bteng bad mynta ha kane ka EC bala lamkhmat da ka VPP kaba baroh ngi dap da ka jingkyrmen ba kane ka jingïakhun kan jah noh, kumba ki kren ha rynsan hynrei kam pat don satia ka jingkylla.
Kum u nongïalam u la kyntu ïa kane ka EC ba mynta ruh ba sngewbha ban sangeh noh ka khrong pisa ïala ki paradoh parasnam namar kane ka ktah shisha ïa ka kamai kajih baroh, namar ki District Council ka ioh ban pynieng khyrdop ym ban khrong pisa hynrei ban talasi na ka bynta ki kali kiba wan nabar jylla katkum ka aiñ Trading by Non-Tribal, Regulations namar ïa kaei kaba ki trai muluk ki lah ban leh, kim lah ban khrong pisa katba mon, bad ki check gate kim dei ban long ki jaka khrong pisa wat na ki kali bar jylla ba kin ioh pat ban ïaid sahuh haka jylla, kata ka long ba shu shu die tad dor ïa kata ka aiñ kaba pyrkhing ïa ki, haka jaka ba kin talasi ïa ki kot ki sla jong ki.
“Ngi dap da ka jingkmen ban iohi ïa ka jingtai ñia u Bah Ardent Miller Basaiawmoit President ka VPP ba ka District Council ka dei ka waitlam bad ka shong sa haka jingnang jong ngi kein ban pom lada ngi pom da kaba luiñ ngin nym poi shaei shaei, hynrei lada ngi pom da kaba nep kamut ka jaitbynriew ka im” la ong u Bah Marngar, dakaba bynrap ruh ba u Bah Ardent dalade u la dei u nongïalam sengbhalang bad u long teng ruh u CEM, hynrei imat kumba iohi mynta u Bah Ardent u la shu aimon ïa u CEM bad ki EM ba mynta ki bym pat tip bha ïa ka aiñ, te ngi kwah ba u Bah Ardent un tuklar ban hikai ïa kane ka EC ba mynta ban pyntreihok ïa ka aiñ ban khang ki kali ba nabar, namar ban shu khrong pisa kam don jingmut bad kane ka pynjot pynban ïa ki briew jong ngi, u la bynrap.
Namarkata u la kyrpad ïa kane ka EC kaba mynta ba kum ki nongñiah trok kim kwah shuh ban dang ïakhun da ka thma kumba la leh haki EC kiba rim, namar ka jingïakhun hi ka long para Khasi bad ngi kwah ban pynkut noh ïa kane ka thma ba ki nongñiah bad ki trai trok kin ioh ban kamai suk kamai saiñ khlem kano kano ka jingshah pynthud
Na ka liang u Bah Wanshuwa Nongtdu u la ong ba ka jingud ki nongñiah trok ha kaba ïadei bad ka jingshah khrong pisa ka la long kaba palat namar ki don haduh 16 tylli ki khyrdop ba ki hap ban siew ha Ri-Bhoi District namar bun ki nongñiah trok ki ioh bai bylla na ki trai trok tang kumba 3 hajar eiei kum ka nuksa hynrei ban siew T.200 haduh T.500 tyngka kawei ka khyrdop hynrei haba kheiñ haduh 16 tylli ki khyrdop ka la poi katno shuh namar kim treh ban shim haka dor bar it 20 ne 50 tyngka.
Namarkata kum ka kynhun ki kyrpad ïa kine ki khyrdop ban sangeh noh shisyndon ka khrong pisa shuwa ban jia ka thma ne ka jingjia ba sngewsih khnang ban ïa kamai suk kamai saiñ lang baroh.