Nongpoh, Naitung, 10: Na ka bynta ka jingsngaiñ ki paidbah ha ka leit ka wan bad ban lait na kiba bun ki jingjia ba sngewsih ïa ki paidbah, ka National Highway Authority of India kan sa tei haduh 7 tylli ki jingkieng ïaid kjat (Foot Over Bridges) ha ka surokbah National Highway-6 ha Ri Bhoi District.
Kane ka dei kawei na ka mat jingdawa ka Synjuk ki Rangbah Shnong Ri Bhoi District ha ka jingïalam u Bah B.B Makdoh kum u Chairman bad u Bah P.B Sylliang kum u Secretary, kiba la ïaid shakhmat ban dawa na ka NHAI ba ka dei ban shna ïa kitei ki jingkieng ïaid kjat shi bynta ban shngaiñ ki padbah ha ka leit ka wan bad ban lait na kino kino ki jingjia ba sngewsih.
Ka surok National Highway-6 ha Ri Bhoi District, ka dei kawei na ka surok kaba bun bah ki nongleit nongwan ym tang na ka jylla Meghalaya bad ka dei ruh na kiwei ki jylla jong ki jylla shatei lam mihngi ka ri India. Bunsien ki ju jia ki jingjia ba sngewsih ba kam don ka jingshngaiñ ïa ki paidbah ha ka leit ka wan bad la jin ba ka NHAI kan shna ïa kitei ki 7 tylli ki jingkieng ïaid kjat ha ki jaka paidbah kane kan ïarap shibun ban lait na ki jingjia ba sngewsih.
Related Posts
Haba ïa kren bad u Secretary ka Synjuk ki Rangbah Shnong Ri Bhoi District, u Bah P.B Sylliang u la ong ba ka Synjuk ka la buddien na ka por sha ka por halor ka jingdonkam ban shna ïa kine ki jingkieng ïaid kjat bad ka long pat ka jingkmen kaba khraw ba ka NHAI ka la shim khia bad ka la mang pisa na ka bynta ban shna haduh 7 tylli ki jingkieng ïaid kjat ha kane ka surokbah kaba dei kawei na ka thong ban pynsuk ïa ki paidbah haba ki ïaid kjat lyngba kane ka surokbah.
U la ïathuh ruh ba la mang ruh ban shan ïa kine ki surok ïaid kjat haduh 7 tylli ki jaka ba kynthup kawei ha Byrnihat, Pahammawlein, Umling, Nongpoh, Umsning, Mawlein Mawkhan bad kawei pat ha Umroi ba hap ha ka surok Shillong by-pass ban pynïasoh sha Umroi Airport.
“Kum ka Synjuk ka dap da ka mynsiem jong ka jingsngewkmen ba shen kin sdag noh ban shna ïa kitei ki jingkieng ïaid kjat kaba long ka jingdonkam ki paidbah ha Ri Bhoi bad baroh kine ki urlong ka dei hi lyngba ka jingïatrei lang naduh ki nongmihkhmat ka Ri Bhoi, ka ophis u Deputy Commissioner, ki Seng bhalang bad kumjuh ruh ka Synjuk lyngba ki nongïalam Shnong ha Ri Bhoi” ong u Bah P.B Sylliang.
U la bynrap ruh da kaba ong, ba ka synjuk ka kyrpad ïa ka ophis u Deputy Commissioner ba kan kham shim khia ban bthah ïa ka NHAI ban pynsted ïa ka kam, khnang ba katei ka jingthmu kan long kaba jop bad lada la lah ban lei lei ban shna ïa kitei ki jingkieng ïaid kjat kan long ka jingshngaiñ shisha ïa ki paidbah ban nym donkam shuh ban ïaid lyngba ka surokbah kaba buh jingma bad ki la pyndonkam lyngba kitei ki jingkieng ïaid kjat haba jam na shiliang sha shiliang ka surokbah, u la bynrap.