La sdang ïa ka education mission phase-IV ban tei ïa palat 150 tylli ki skul LP, ïathuh u Rakkam

Shillong, Naitung 04: U Myntri ka tnat Pule Puthi ka sorkar jylla u Rakkam A Sangma u la pynbna ïa ka jingsdang ka education mission phase-IV na ka bynta ban tei ïa palat 150 tylli ki skul lower primary ka sorkar ha kylleng jong ka jylla.
“Ka phase-IV ka la dep ban sdang bad mynta ngi dang pynkloi ban khot ïa ka tender hadien ba ngi la ïoh ka jingmynjur na ka tnat Pla Tyngka. Kumta ngi dang ap na ka bynta ban ïoh ka jingmang na ka bynta kiwei pat ki 100-150 tylli ki building na ka bynta ki skul LP jong ka ka sorkar,” ïathuh u Sangma sha ki lad pathai khubor.
Katkum ka jingïathuh u Sangma, ka sorkar jylla ka la leh bun ki sienjam ba kongsan ban pynïaid shaphrang ïa ki kam pynthymmai bad ki jingtei ïa ki school building ha kine ki 4 bad 5 snem ba la leit.
Palat 2,000 ki skul lower primary ka sorkar kiba la dep ban pynthymmai, bad palat 500 ki skul LP ba thymmai kiba la tei.
U Myntri u la banjur ba ka jingshim khia ban khmih ïa ki skul kiba la jot ka la dei ka kam kaba la slem jong ka sorkar jylla.
U Sangma u la pynpaw ruh ba ki sorkar kiba la leit ki khlem shimkhia haba ïadei bad ka pule puthi kaba long mynta la kumba 20-30 snem, hynrei kane ka sorkar MDA ba mynta ka la buh hakhmat eh ban pynthymmai bad ban tei ïa ki skul kiba thymmai na ka bynta jong baroh ki skul sorkar.
Tang hapoh ka constituency jong u, u Sangma u la lah ban tei thymmai la palat 45 tylli ki ad hoc bad ki skul SSA kiba hapoh ka SRWP scheme.
Na ka liang u Myntri u la kyrpad ïa baroh ki nongthaw aiñ bad ki MP ban nohsynniang ban pynbha ban kyntiew ïa ki jingtei ïa ki skul, da kaba banjur ba ka long ka jingïaleh kaba kongsan ïa ka jylla haba ïadei bad ka pule puthi.