Nongstoiñ, Jylliew 30: Ka surok na Ktiehthawïar haduh Langpih ka dei ka surok kaba donkam bha, namar ba ka ïew Langpih ka dei ka ïew khappud kaba ki paitbah jong ki shnong kiba hap ha ka ri Muliang, ki leit ban siew ban tda ban khaï ban pateng.
Ïa katei ka surok kaba jngai tang kumba khyndai kilomitar la dep siang rong naduh snem 2013-14, hynrei mynta ka la pra bad jot rathai ha klaba ki kali ba kit ïa ki nongleit ïew leit hat ki la shem shitom bha.
Halor ka jingsniew jong katei ka surok ki paitbah nongshong shnong ki la pynpaw ka jingsngewkhia, namar ha ki snem ba la dep wat hadien ba la dep siang rong, ka tnad PWD ka ju ai bylla ban phah prat ïa ki sañium baroh shilynter jong ka surok hynrei la kumba lai haduh saw snem mynta kam ju ai bylla shuh ban phah pynkhuid ïa ki sañium.
Ki nongshong na ki thaiñ Langja , Ktiehthawïar, Umthlu bad kiwei kiwei ki shnong haba pyntip ha u nongthoh khubor, ki la ong ba tang namar ka jingsniew jong ka surok ki nongñiah kali ki ki hap ban pynkiew ïa ka bai leit bai wan bad ka bai kit bai bah bad ki nongdie jingdie ruh ki hap ban pynkiew dor ïa ki mar ki mata namar lada kim pynkiew dor ruh ka bai kali kam mih shuh.
Nalor kata ki la ong ruh ba ki nongdie jingdie kiba wan na kiwei pat ki shnong kum na Nonglang, Kyndongei, Mawkapiah, Kyrdum bad naduh Nongstoiñ kim da sngewthuh than namar ki ïaid na Kyrdum bad ka surok ruh ka dang bha. Nangta na Mawsikar shaduh Langpih la bteng sa ka surok rong ba la shna da ka sorkar Assam.
Nalor kata ki la thnum ruh ïa u MLA ka Rambrai Jyrngam ba naduh ba u la jop haduh mynta um pat leh ei ei bad um pat kren ei ei wat tang shikyntien na ka bynta ka jingmyntoi jong ki paitbah.
Ki la ong ruh ba ha ki don shibun ki briew kiba kren beiñ ïa ki ar ngut ki MLA barim u bah K.P.Pangñiang bad u bah Kimfa S. Marbañiang, da kaba kynnoh ba kim leh ei ei, hynrei une u MLA ba mynta lei lei wat tang ban ïakynduh ruh kim ju ïakynduh satia. Ki la ong ruh mynta lei lei bad MLA bad MDC na ka juh ka ïing te imat ka dei halor kane ka nongrim ba kim kheiñ briew shuh ïa ki paitbah.
