Na u DyCM kyrpad ki lai shnong ban buh noh da ka ktem pulit ban wanrah jingshngaiñ ïa ki paid khappud

Shillong. Nailur 09 : Ki nongshong shnong na ki lai tylli ki shnong kiba don ha ka khappud Meghalaya-Assam ha West Khasi Hills ha ka sngi Balang ki la wan ban kynduh ïa u Symbud Myntri Rangbah ka Jylla Bah Prestone Tynsong ba ka don ka jingpynbor ïa ki paid khappud ban pynrung kyrteng ïa ki ha ka khanasamari jong ka Assam.
Kane ka kynhun hapoh ka jingïalam jong u MDC ka Rambrai, Bah Lurshai Kharbani ki la pan jingïarap bad kyntu ruh ïa ka sorkar jylla ba kan tuklar mardor halor kane ka bynta na bynta ka jingshngain jong ki paidbah ha khappud..
U Bah Lurshai ha ka jingïakynduh ïa u Symbud Myntri Rangbah ba peit ïa ka tnad Home (Police) u la ong ba ki shnong kiba shah ktah ki kynthup naduh ka Kampaduli, Noapara bad Bangjen.
Da kaba kdew ïa ka jingong jong ki nongshong shnong, u MDC u la kynnoh ba ki ophisar na Assam ki ju wan bunsien sha kane ka thaiñ bad “pynwit” ïa ki nongshong shnong.
“Ki briew na Assam ki wan ban pynbor ïa ki briew jong ngi ban rung ha ka khanasamari jong Assam. Ki briew jong ngi ki la ïathuh ïa ki ba kim kwah ban leh ïa ka khanasamari hapoh Assam namar ki la dep leh ïa ka hapoh Meghalaya,” ïathuh u Bah Kharbani haba kren bad ki lad pathai khubor.
Shwa kane, u la ïathuh ba ki nongshong shnong ki la dep ïakynduh ïa u Deputy Commissioner bad u SP jong West Khasi Hills shwa ba kin leit ïakynduh ïa u Symbud Myntri Rangbah.
Ha kajuh ka por u la ong ba u la kyntu ïa ka Sorkar ban buh mardor ïa ka temporary police camp ha kane ka thaiñ, khnang ban wanrah ka jingsngew shngaiñ ïa ki nongshong shnong.
“Ngi la pan ïa ka temporary camp khnang ba ki briew kin sngew shngaiñ bad ïoh jingïada na ki bor kiba wan na shabar. Halor kane, u Symbud Myntri Rangbah u la kular ïa ngi ba un ïakren bad u Chief Secretary jong Assam ban pynbeit ïa kane ka jingïakajia,” u la ong.
U la bynrap ba ka Sorkar ka la kular ba ka jingdawa ban buh ïa ka temporary police camp kan long kawei na ki mat kiba yn shimkhia kyrkieh.