Wat hapdeng ka jingkhih phaloh hapoh ka UDP, Ïaid sha khmat u kyrtong MP ban ïalap election

Shillong, Nailur 9: Hapdeng ki khubor ba u lah ban weng noh ïa ka jingïakhun jong u na ka bynta ka bye-election jong ka Shillong Parliamentary seat, u kyrtong ka UDP u Bah Vivanstone G Kharngapkynta ha ka sngi Balang u la ong ba u kham duna ka jingkhuslai halor ka “jingïakynad hapoh” hapdeng ki MLA ka party bad pynskhem ba ka jingïalap elekshon jong u kan ïai bteng.
Kane ka jingkren jong u ka wan hapdeng ka jingbym thikna kaba nang jur hapoh ka UDP halor ki khubor ba katto katne ngut ki MLA jong ka ki dang ïamir jingmut bad ki nongïalam ba shapoh jong ki halor ka lawei jong ka saiñ hima sima jong ka seng bad ka jinglah ban rung sha ka BJP.
“Ka jingïalap elekshon ka ïaid bad ngan leit sha ki paidbah ban pan ïa ka jingkyrshan”, la ong u bah Kharngapkynta haba la ioh ban ïakren ïa u.
Haba kynthoh ïa ki khubor ba u thmu ban weng noh ïalade na ka jingïakhun, u Bah Kharngapkynta u la kyntait ïa ki kum ki khubor hamsaïa ba la pynsaphriang ban wanrah ïa ka jingtieng bad jingbym shong shngain ha ki paidbah.
“Ki khubor hamsaïa ki dei tang ki khubor hamsaïa, kiba la pynsaphriang ban wanrah ïa ka jingtieng, ka jingpynshong syier bad jingbym shong shngain ha ka jingmut jingpyrkhat jong ki paidbah”, u la ong.
U Bah Kharngapkynta ka la pynskhem ba ka jingïakhun jong u ka la ïoh ïa ka jingkyrshan na ki nongïalam ka UDP bad ki nongtrei ba shapoh, da kaba ong ba la tyrwa ïa u da ka party bad la kyrshan da ki nongïalam, ki nongtrei, ka seng kynthei bad ka seng samla jong ka party ha ka jingïadon lang jong baroh ki MLA bad MDC ka UDP ha ka jingïalang jong ka party ha ka 28 tarik u Jymmang.
“Nga don ïa ki thong jong nga bad ka jingngeit kaba khlem artatien ha ki paidbah ka Shillong Parliamentary Constituency bad kin jied ïa nga ban jop kum u MP na ka bynta ka samoi kaba dang sah kaba lehse 24 bnai ne kumta,” u la ong.
Hynrei u Bah Kharngapkynta, u la paw ba um shym la sngew ei ei ïa ki jingjia hapoh ka seng bad u la ong ba ka jingpyrkhat jong u, ka dang ïa sah bad ki paidbah nongjied.
“Ka UDP ka dei ka kynhun ba la bat da ki briew kiba lah ban wan bad leit katkum ka jingkwah jong ki”, u la ong.
Haba pynkynmaw biang ïa ka saiñ pyrthei jong u, u Bah Kharngapkynta u la ong,”Phim lah ban pynbiej ïa ki paitbah.Ka sur jong nga ka long ka jingkitkhlieh bad kaba khuid ba shai.”