Nongpoh, Jylliew 30: Ka ophis u Deputy Commissioner ka Ri Bhoi mynta ka sngi 30 tarik Jylliew ka la plie paidbah ïaka prokram ai jinghikai sha ki khun samla ka Ri Bhoi District ban pyntbit ïa lade ha ka ban aireng ha ki eksamin thungkam bapher bapher, bad ïa kane ka program la plie ha Ri Bhoi College Nongpoh kaba hap ha ka Umling C&RD Block ha Ri Bhoi District.
Haba plie ïa kane ka prokram ai jinghikai ïa ki samla la don ryngkat naduh u Bah Mayrlandborn Syiem ha ka jingdonlang u Abhilash Baranwal IAS Deputy Commissioner ka Ri Bhoi, u Bah Eric Kevin Dkhar BDO Umling C&RD Block, u Soumen Das, Director T.I.M.E Shillong Guwahati, lem bad ki samla kiba la shim bynta ha kane ka prokram kyrpang.
Kane ka prokram ka dei shi bynta na ka ka Chief Minister’s Career Guidance and Counselling Scheme, kaba dei ka skhim kyrpang ban hikai pyntbit ïa ki samla, ha kaba la pynlong da ka ophis u Deputy Commissioner ha baroh ki Block jong ka Ri Bhoi ryngkat ka jingïatrei lang ki MLA bad ka Triumphant Institute of Management of Education (TIME), Shillong-Guwahati.
