Jowai, Jylliew 28: Ka HNYF kawei na ki kynhun seng treimon sngewbha kala pan jingpynshai lyngba ka RTI na ka ophis ka District Medical Health Officer (DMHO) Jowai halor ka jingduna Doctor hapoh ka Nartiang CHC da kaba dawa ban pynbun shuh shuh ïa ki doctor katkum ka jingdawa jong katei ka jaka sumar.
Shuh shuh ka seng kala ong kumba long mynta la lap ba don tang uwei u doctor ha katei ka CHC bad kane ka shem shitom ban pynbiang ïa ka jingsumar ïa ki nongpang kiba wan ban ïoh jingïarap na kane ka Nartiang CHC.
Ka seng kala pynsngew ruh wat ïa ka rukom thung ïa ki nongtrei ba shipor (officiating staff) ha katei ka CHC kam long kaba shai namar kitei ki nongtrei ki hap ban bteng ïa ka kam da ki bun bun snem, halor kane ka jingwad jingtip ka seng ka ïathuh wat na ka liang ka DMHO kam tip satia ïa katei ka rukom thungkam.
Na ka liang ka HNYF ka kwan ban pan jingshai na ka tnad ka koit ka khiah da kaba ong mano ba thung ïa kitei ki nongtrei shipor (officiating staff) kiba la ïoh ban trei hadun mynta, da kaba kylli shano kita ki briew kiba dei pura ban trei ïa katei ka kam bad balei ka sorkar ka ai lad ïa kum kane ka rukom treikam ki bym ïaid katkum ki kyndon treikam bad la ailad pynban tang ha ki briew kiba don haka bor.
Halor kane ka HNYF kala pynrem jur ïa ka rukom treikam jong ka sorkar bad la kyntu jur ïa ka sorkar ban sangeh ïa kum kane ka rukom thungkam beaiñ bad ki bym shai. Pynkut ka kyrwoh na u D. Symblai uba dei u General Secretary ka HNYF Jaiñtia Zone.
