Shillong, Jylliew 25 : Kum shi bynta ka jingrakhe ïa ka jingdap 11 snem ka jingshakri jong ka Sorkar Pdeng hapoh ka jingïalam jong u Myntri Rangbahduh ka Ri u Narendra Modi, na ka liang u Myntri Khynnah ka Ministry of External Affairs, u Pabitra Margherita u la wan ban shim bynta ha ka jingthung dieng kaba la pynlong ha jaka jong ka skul Raid Laban Secondary School ha ka step sngi Balang.
Kane ka skul kadei kaba la rim bha namar ka la sdang ban ai ïa ka jingshakri ïa ki paidbah ka thain mynta la 53 snem kaba long ryngkat ryngkat bad ka jingïoh jylla jong ka Meghalaya.
Ïa kane ka jingthung dieng la pynbeit da u MLA ka Shillong South Bah Sanbor Shullai ryngkat ka jingïatreilang bad ki bor pynïaid skul bad kumjuh ki nongïalam shnong.
La donlang ruh ha kane ka sngi naduh u Myntri ka tnad Animal Husbandry and Veterinary ka sorkar jylla Bah Al Hek nalor kiwei kiwei.
Na ka liang u Myntri Khynnah ha ka jingkren lyngkot u la pynpaw ïa ka jingkmen ban ïoh ban shim bynta ha ka jingthung dieng ha katei ka step ha jaka jong katei ka skul kaba la seng naduh ki snem marbud bad ka jingïoh jylla jong ka Meghalaya.
Hadien kane, u Myntri u la pynlut por ruh ban ïa kren bad ki nongïalam shnong kumjuh bad ki nonghikai halor kiba bun ki phang.
