Shillong, Jylliew 23: Ka Mawphlang SC, Mawlyngngad SC bad ka Laitlulong SC ki la ïoh ban khur pura ïa ki lai point hadien ba ki la jop ïa la ki jong ki jong ki jingïalehkai jong ka lympung U-20 Fourth Division 2025 ba la pynïaid da ka Shillong Sports Association kiba la long hynne ka sngi Nyngkong ha madan First Ground-SSA Stadium, Polo.
Na ka liang jong ka Mawphlang ka la lah ban pynliem ïa ka Mawpdang SC da 2-0 kol ban khur pura ïa ki lai point na ka Group-D, ka jingïalehkai kaba bud na ka Group-B la sakhi ïa ka Mawlyngngad SC kaba la jop suk da 3-0 kol ïa ka Pynthorbah SC. Ka Laitlulong SC ka la jop da 2-0 kol ïa ka Umsohsun SC na ka Group-D ha ka jingïalehkai ba khatduh jong kane ka sngi (23 tarik Jylliew, 2025).
Ka Mawphlang ka la pynskhem ïa ka jingjop da ar tylli ki kol na u Sundarsing K Syiemiong (4’P) bad u Arkindonlang Hujon (75′).
Hadien nangta, ka jingïakhun hapdeng ka Mawlyngngad bad ka Pynthorbah la sakhi ïa u Bamar Kharsahnoh (40’min) uba la buh hakhmat ïa ka Mawlyngngad ha ka khyllipmat shuwa ban kut ka kylla step. U la bynrap biang sa ïa ka kol kaba ar ha ka minit kaba 51 shuwa ba u Batmiki Kharkongor (67′) un pynkhih ïa kaba lai.
Kumjuh ka jingïalehkai kaba khatduh, baroh ar tylli ki kol jong ka Laitlulong la thep ha ka kylla miet, lyngba u Raplang Snaitang (49′) bad u Bankerlang Khardewsaw (80′).
Kin don lai tylli ki jingïalehkai ha kane ka sngi baar ha kaba ar tylli kin dei na ka Group-E, ha kaba ka New Challenger kan ïakhun pyrshah ïa ka Iateilang Lamlyer, ha ka por 10 shiteng mynstep, nangta ka Mawnianglah pyrshah ïa ka Laitumkhrah, ha ka por 1 baje shiteng, kaba khatduh kan long na ka Group-F hapdeng ka Mawlynrei pyrshah ïa ka Riatsamthiah ha ka por 4 baje janmiet.
