Shillong, Jylliew 22: Kumba 3 ngut ki briew ba kynthup lang ïa kawei ka khynnah samla kaba dang 16 snem ka rta ki la shah kem ha ka jingkynnoh ba ki la donkti ha ka kam pajut sohshkor ban tuh ïa ki jingdeng shkor ksiar na ki arngut ki khynnah rit ha nongbah Shillong.
La ïathuh ruh ba kawei ka khynnah CCL kaba dang 16 snem bad 9 bnai ka rta, Mabanker Jyrwa 23 snem ka rta na Jaïaw, Lansonalane bad Charles Myrthong ba la 20 snem ka rta na Riatsamthiah ki la shah bat ha ki pulit ka Mawlai, East Khasi Hills, ïathuh u SP Bah Vivek Syiem ha ka sngi u Blei.
U tei u heh pulit u la ïathuh ruh ba la dep ban kurup ïa ki tiar hadien ba la ïalam da CCL bad kiba shah kynnoh na Mawbah, New Oscar Jewellers Shop bad la kurup ruh ïa ki tiar kumba ka dei ban long.
Ïa kane ka jingïoh kem ïa ki ka la long ruh halor ki jingujor ki artylli ki FIR ba la ujor ha ka 18 bad 20 tarik mynta u bnai.
U la ïathuh ruh ba Elinda Marbaniang, ba shong basah ha Mawlai Nongkwar Block ka la ujor ba ha ka 18.6.2025 hapdeng ka por 1:30 nohphai sngi bad ha ka 2 baje nohphai sngi ka khun jong ka kaba dang 9 snem ka rta ka dang wanphai na skul ha kaba kawei ka khynnah kynthei ka la buddien na ka lynti ïaid kjat ha Wahumkhrah ha kaba ka la kylli ïa ka khun jong ka ba ka don jingtip eiei shaphang u Adrian uba dang pule III ha kaba kane ka khynnah kam lah satia ban ai ïa ka jubab kaba dei.
U SP u la pyntip ruh ba kane ka samla ka la bud ïa ka haduh Mawlai Nongkwar Block-2 bad ka la ktah ruh ïa ki shkor jong ka, ha kaba da ka bor ka la pajut ïa ki sohshkor ksiar jong ka bad ka la phet krad na kane ka jaka.
Ha kawei pat ka liang u SP u la ïathuh ruh ba ka Sumardiam Kharlukhi na ka shnong Mawlai Nonglum u la phah ka jingujor haba u la pyntip ba ha ka 20/6/2025, hapdeng ka por 4. Baje bad 4.30 baje janmied, lai ngut ki briew bym lah ban ithuh, ha kaba kawei kadei ka kynthei bad arngut ki shynrang ki la wan sha ka ïing jong ka ha kaba ka khun jong ka kaba dang 9 snem ka rta ka dang ïalehkai shabar, ha kaba kawei na ki kynthei ka la pajut ïa ki shkor bad ka la phet krad na kane ka jaka.
