Twa ki pynthor kba, jaw ummat ki nongrep ka thaiñ Mawsaw, jurip ki nongïalam ka HFU, SWKH

Mawkyrwat, Jylliew 22: Hadien ka jingwan jong u slap uba jur ha kine ki khyndiat sngi ha kaba ka la pynlong ïa ki pynthor kba ba ki dap smam da ka um bad pynlong ruh kum ki wah bah bad da ka jingdap jong ka um ka pynshong synjor ruh ïa ka khyndew ha kaba kiba bun ki pynthor ki la shah rong noh ïa ka khyndew ha ryngkat u kpa.
“Ki pynthor kba kiba la shah ktah jur ki long ha twah Wahtyllang, ha Tdongkynbah bad Photspiar”, haba kine baroh ki hap hapoh u pud u sam jong ka shnong Mawsaw.
Halor kane ka jingshah ktah jong ki pynthor kba jong ki nongrep na ka liang ki nongïalam jong ka Hill Farmers Union (HFU), South West Khasi Hills District hapoh ka jingïalam jong u President, bah Firmly Iawphniaw ki la hiar jurip ïa ki ha manla ki them ba don ki pynthor bad ki lap shisha ba ka don ka jingïam briew na ka daw ba kim lah shuh ban shna pynbha pat ïa ki pynthor ba la shah rong bad shah pyntwa ha ka um slap kaba la neh bun sngi kat haduh ban da ryngad ka um ki pynthor kim long shuh bad ym don khyndew sboh shuh ne wat u kba.
“Ki pynthor ki la kylla kum ki wah bah kum ki krem ba la lap dien trai biang kum mynhyndai ha ka por bym pat shna pynthor, ka jingïap thngan ka ap ïa ki nongrep nalor ba ki duh ïa ka pynthor ba ki la rep baroh shi jingim mynta la i artatien ba kin lah ban shna pynbha pat”, ong u bah Firmly.
U la ong ruh ba ha kiwei pat ki snem kum ha une u bnai ki nongrep ki la pynkhreh ban leit pynkhuid ïa ki plang ki kynbat hynrei jia pynban ka apot sep sngi ba hap leit ïam briew ha ki them pynthor kba.
Haba kren ha ki lad pathai khubor, ka kong Rasomda Kharjahrin bad kong B. Ramsiej na ka Shnong Pyndensakwang bad kiwei de na ka thaiñ Mawsaw South West Khasi Hills District kiba dei ki nongrep kba da ka dur khmat ba sngewsih bad jaw ummat ha kaba ki la leit ban jngoh ban peit ïa ki hali ki pyntha kba jong ki hadien ba u slap u la rang ki la lap ba ki jaka rep jong ki la dap satang ka um bad da ka jingrong ïa ka khyndew ki la kylla thliew kiba heh ba ka um ka la rong noh ïa ka khyndew bad ka la rat naphang ruh ïa ki jingker wat ïa ka khyndew trai ba ki la dep sara ne thung ïa u kba.
“Ki don ruh ki jaka ba la long kum ka thwei dohkha ha ki pynthor kba bad da ka jingsngewsih kthang kaba ym lah ban batai halor kine ki jingshah pynjulor bad lyngshop noh ha ka bor jong ka mariang ha kine ki sngi ki taïew ba la dep”, ong ki nongrep.
Namarkata, kum ki nongrep da ka mynsiem ba sngewkhia ki la duh jingkyrmen shikatdei eh ki la pyrkhat ba kumno shuh ban pyndap pynbiang ïa u khaw u kba ha ïing ha sem na ka bynta une u snem ban sa wan ha kaba kim lah leh ei ei shuh ban pynbha pat ïa ki ne ki jaka ba la shah pynjulor ha ki bor ka mariang namar ba ha kine ki sngi ka dang dei ka por bet por thung ïa ki symbai kba bad haei pat ba kin thung ne rep namar ïa ka khyndew la dep ba rong lut da ka um.
Kumta na ka liang ki paidbah nongrep da ka mynsiem kaba sngewkhia ki kyrpad rit ïa ki bor sorkar lyngba ka tnad ophis ba dei peit ïa ka rep ka riang ba kan thawlad thawlynti lem ban ïarap lem ïa ki la ha kino kino ki bynta katkum ka jinglah jong ki khnang ba kan ymdon kano kano ka jingjynjar ne ïap thngan ha kine ki snem ban sa wan namar ha ba peit ha une u snem kim i don lad shuh da kumno kumno ban shna pynbha biang ïa ki hali ne ki pynthor kba jong ki namar ki la kut ka lad ka lynti ha kaba ïa dei bad mynta u snem.
Kumta kum ka Hill Farmers Union, South West Khasi Hills District ka kyrpad jur ïa ki bor ba dei peit ba kin sngewbha ban thaw lem ki lad jingiarap ban kyrshan ïa ki nongrep kba ba kin lah ban leit shna pynbha pat ïa ki pynthor bad khamtam u kba ba ki ju ap khmih lynti ban pyndap bam baroh shi snem.