Nongpoh, Jylliew 18: U Bah Albertus Lapang kum u nongïalam ka party NPP ha Ri Bhoi bad ha Jirang Block, u la pynbna ïa lade ba u la mih noh na kane ka party bad ba um dei shuh u nongïalam ne u dkhot jong kane ka party NPP.
U Bah Albertus Lapang u dei uba bat kum u Organizing Secretary ka NPYF ha Ri Bhoi District bad ruh kum u dkhot ka NPP na ka Jirang Block bad haka shithi iehnoh kam ba u la phah sha u President ka NPP Ri Bhoi District bad sha u president ka NPP Jirang Block, u Bah Albertus Lapang, u la pynpaw ba ka jingiehnoh kam ne kum u dkhot nongïalam ka NPP kam dei satia na kano kano ka daw ba u pyrshah ïa ka paty, hynrei ka daw kaba la pynlong ïa u ban mih noh na kane ka party, ki dei halor ki daw shimet jong u, kaba um lah shuh ban ïa don bynta bad kum u nongïalam ne u dkhot ka party.
Na ka liang u Bah Albertus Lapang, wat la u la iehnoh kam na ka party NPP, hynrei ai ka jingkitbok kitrwiang ïa kane ka party ba kan dang bteng ka jingshakri bad kumjuh ruh ban wan rah shibun ki kam pynroi ha Ri Bhoi District, ka ban ai jngmyntoi na ka bynta ka Jirang Block bad ka Ri Bhoi District hi baroh kawei.
U Bah Albertus Lapang, u dei ruh u khun jong u Bah William Mynsong, MDC barim ka Jirang, u pyrsa u Dr. D.D Lapang bad uba pan ticket ruh na ka party NPP ban ïa khun ha ka election MDC ba la dep bad mynta pat u la shim ïa ka rai ban iehnoh kam syndon naka party da kaba pynpaw ba ka dei ka kam shimet jong u.
