Bthah ka sorkar ban pyndait CCTV ha manla ki jaka ba khring ïa ki nongwan jngohkai ha jylla

Shillong, Jylliew 17: U Myntri ka tnat Tourism u Bah Paul Lyngdoh ha ka sngi baar u la ong ba ka sorkar ka la rai ban shim ïa ki lad ki lynti ki ban ïada bad ai jingshngaiñ ha ki nong wan jngohkai kiba wan sha kane ka jylla.
Kine ki lad ki lynti ki kynthup ïa ka jingthoh kyrteng, nangta ban pyndait ïa ki close circuit televisions (CCTVs) ha ki jaka jngohkai bad kumjuh ruh sha kiwei kiwei ki jaka.
Haba kren sha ki lad pathai khubor u Bah Lyngdoh u la ong ba baroh ki accomodation unit mynta kin hap ban thoh ïa ki kyrteng jong ki briew kiba wan jngohkai lyngba ka tourism app, kaba la don bad ha kaba mynta ki la don kumba 60% kiba la pyndonkam ïa ka.
U la ïathuh ruh ba na ka liang ka sorkar ka la khang ka jingpyndonkam ïa ki kali shimet ban kit ïa ki nongwan jngohkai sha kane ka jylla.
“Kaba kham kongsan shuh shuh ka dei ka rai jong ka sorkar ban bishar biang ïa ka MRSSA bad ban pyndep shuh shuh ïa ki bniat jong ka khnang ban lah ban tehlakm ïa ki kam runar,” u la ong.
U Myntri ula ïathuh ruh ba da ka jinglap ïa ki sakhi haba ïadei bad ka jingshah pynïap jong u nongwan jngohkai na Indore ka la ïarap ïa ka jylla ban shem ïa ki kam runar kiba la jia sha kane ka thaiñ.
“Na ka liang jong ki pulit ki la lah ban pyndep ïa kane ka kam runar ka Sonam tang ha ki 7 sngi. Da kane ka jinglah ban shim khia jong ki pulit nga ngeit ba kiba wan jngohkai kin ïoh ki lad jingïada haba ki wan sha kane ka jylla Meghalaya. Phi lah ban wan kum ki tourist, ngi pdiang sngewbha ïa phi hynrei lada phi wan rah lang bad ki kam runar ki pulit ka jylla ki don ban khmih ïa phi ha kano kano ka rukom,” u la ong.
“Kin sa don kumba 50 tylli ki kali thymmai bad yn sa khot shen ïa ka tender na kiba sengkam la jong ha kaba ïadei bad kane ka scheme,” u la bynrap.
Shuh shuh u Myntri u la pyntip ba ka sorkar ka la kyntu ïa ka Sohra Tourism Association ban ai ki jaka kiba lah ban pyndait ïa ki CCTV.
“Shisien ba la ïoh ïa ka thup ki kyrteng ki shnong bad ki jaka ngin sa sdang noh ïa ka kam,” u la ong da kaba bynrap ba kine ki jaka kin kynthup ruh ïa ka Umïam Lake, Ward’s Lake, Sohra, Dawki bad kiwei kiwei.
Haba ïadei bad ka jinghiar ki nong wan jngohkai sha ka jylla na ka jingjia shah pynïap u nong Indore u Myntri u la ong, “Haoid ki lah ban don ki jingjia kiba lah ban ktah ïa ka kam jngohkai hynrei ym dei pat ban shim ba kane ka rai kan long kaba ktah tang na kane ka jingjia kaba shisien. “Halor ka jinglang um jong ka surok ha Khanapara bad Jorabat, ngi la dep ban ïa syllok ha ka kyrdan jong ki Myntri Rangbah ka Assam bad Meghalaya, kumta ngi khmih lynti ruh ba ka tamasa kum ka Cherry Blossom 2025, la khmih lynti ba kan khring shibun kiba wan jngohkai sha kane ka jylla,” u la ong.