Sam shithi thungkam nurse u Myntri Rangbah sha palat 2 spah ki nurse thymmai hapoh ka MMSRB

Shillong, Jylliew 16: U Myntri Rangbah ka jylla u Conrad K Sangma ha ka sngi Nyngkong u la sam ïa ki shithi ai kam ïa palat 200 ngut ki nurse kiba la shah thung kam thymmai hapoh ka Meghalaya Medical Services Recruitment Board (MMSRB) bad kumjuh ruh ïa ki 115 ngut ki nongtrei hapoh ka National AYUSH Mission (NAM).
Haba ai khublei halor kane ka jingthung kam, u Myntri Rangbah u la ong, “Kane kan dei ka kam kaba kham heh ban dei tang ïa ka kam, kaba dei ka kam ruh ka kam kaba la shah khot. Ka jinglah ban kynduh ïa ki nongpang kadei ka kam kaba hap ban sngewsyn ei bad kane ka kam jong phi kan dei ban wanrah ka jingkylla ha ki jingim.”
Ha kane ka sngi u Myntri Rangbah u la pyllait ruh ïa ka Meghalaya State Antibiotic Policy 2025-2026.
Ka Meghalaya ha kane ka kynti ka la bhah 8% na ka pisa ba la mang sha ka koit ka khiah kaba dei kaba heh tam ha ka ri. Naduh ka snem 2010, ka jingmang pisa jong ka jylla ha kaba ïadei bad ka koit koit ka khiah ka la kiew sha ki 6 shah, ha kaba na ka T. 300 klur sha ka T. 1,700 klur ha u snem 2023. Ki la don ruh ki jingpynlut ha ki jaka kum ki PHC, CHC, sub-centre, bad ki district hospital lyngba ki jingpynbiang ki jingtei, ki tiar sumar, ki, IT system, storage, logistic, bad kiwei kiwei pat ki tiar ba la sam.
Haba ïathuh shaphang ki jingwanrah ïa ki jingkylla ba la shim da ka sorkar, u Sangma u la ong ba ha u snem 2018, hadien ba ka jylla ka la mad ïa ka jingduna ki doctor, ka sorkar ka la thungkam kumba 500 ngut ki doctor tang ha ki 3 bnai ha shwa ban ïoh ka jingmynjur jong ka kynhun Myntri Sorkar.
“Ka jingthmu jong ngi ka long kaba shai ba yn ym don ki nongshong shnong ka Meghalaya ban leit phah sumar shabar. Ngi kwah ban pynlong ïa kane ka jylla kum kawei na ki jaka kaba khring ïa kiba kwah ban phah sumar, ha kajuh ka por ban khot lang ruh ïa ki jaka sumar shiemt ban ïatreilang ban pynkhlaiñ ïa ki kam ai jingsumar ïa kiba pang,” u la bynrap.
Ha kawei pat ka liang ka Myntri ka tnat ka Koit ka Khiah ka kong Ampareen Lyngdoh ka la kyntu ïa kine kiba dang shah thung thymmai ba kin ai ka jingshakri kaba biang bha ïa kito kiba donkam ki lad jingïarap, “Ka pyrthei ka donkam shibun ki nurse kum maphi kiba don ha Meghalaya.”
Na ka liang u Principal Secretary Dr. Sampath Kumar, IAS, u la ïathuh halor ki kam shakri ba ka jylla ka la leh lyngba ka Meghalaya Health Insurance Scheme (MHIS) bad ka MMSRB.
La ïoh ruh ka jingkren na Commissioner & Secretary Dr. Joram Beda, IAS, la don ruh ka jingïasyllok halor ka Meghalaya Cancer Action Program, Ki jaka sumar kiba la shim bynta ki long ka Dr. H. Gordon Roberts Hospital, Nazareth Hospital, Bethany Hospital, Supercare Hospital, Woodland Hospital, Bansara Eye Clinic, SAN-KER Charitable Trust, The Children’s Hospital – kiba na Shillong bad Dr. Norman Tunnel Hospital (Jowai), St. Joseph Hospital (Nongstoiñ), Makarios Medical Centre (Mairang), Holy Cross Hospital (Tura), Tura Christian Hospital (Tura).