Haduh 10 sngi ai por ka JAC ïa ka sorkar ban pyndam noh ïa ka projek shna Ropeway ha Lum Shyllong

Shillong, Risaw 17: Ka Joint Action Committee Against the Shillong Peak Ropeway Project &for tha Protection of Lum Shyllong Catchment ha ka sngi saitjaiñ ka la ai por 10 sngi ïa ka sorkar jylla ba kan pynduh noh ïa ka Project Ropeway ha Lum Shyllong bad ban pynkynriah noh sha kiwei pat ki jaka khnang ba kan nym ktah ïa ka mariang bad ïa ka sawdong sawkun.
Ïa kane ka rai la shim ha ka jingïalang kaba la long hakhmat ka khyrdop ban rung sha ka jaka baq don ka projek hadien ka jingïaid paidbah kaba jai jai jong ki nongïalam ka JAC bad ki paidbah jong ka Laban bad ki jaka ba marjan.
Ki nongïalam bad ki dkhot ka Green-Tech Foundation, kiba kyrshan ïa ka jingdawa ban weng noh ïa ka Ropeway Project, ki la sdang ïa ka “Peaceful March” na Ïew Last-Stop, bad ki la pynkut ïa ka ha ka jaka jong ka projek kaba don ha Riat Laban.
Ka JAC ha ka shithi sha u Commissioner bad Secretary ka tnad Tourism ka Sorkar Jylla ba la soi da ka kong D Marbaniang, President bad ka Dr L Marbaniang Secretary, ka JAC ka la ong ba kane ka por ba khatduh ka long hadien ka jingïalang ba la khot da ka tnad Tourism ha ka 15 tarik mynta u bnai.
Ka Committee ka dawa ruh ba ka Sorkar ka dei ban pyrkhat da kumwei pat halor kane ka projek da kaba pynshong nongrim ha ka jingsngewkhia ïa ka mariang bad ban ïada ïa u Lum Shyllong.
Kane ka por ba la ai kata ka 10 sngi ka la sdang naduh ka sngi saitjaiñ hi ba la pynlong ïa kane ka jingïaid peaceful Rally bad lada ka bad ka JAC ki dawa ba lada ka sorkar kam leh eiei ban pynurlong ïa ki jingdawa jong ki, ka la maham ba kan shim da kiwei pat ki sienjam kiba tyngeh bad ki paidbah nongshong shnong ka Laban bad ka nongbah Shillong hi baroh kawei.
U Chief Secretary barim ka jylla, u Bah Barkos Warjri, uba la kren ha kane ka sngi u la ong ba kum u khynnah samla ha ki por ba mynshwa na ka thaiñ Malki u la ïoh lad bunsien ban leit jngoh ïa ka khlaw bad bunsien u la ïohi ïa ki jingthung jingtep bapher bapher kiba khring ia ka jingitynnad ka mariang bad ka sawdong sawkun jong ka.
U Bah Warjri u la pynkynmaw ba u ju ïohi ïa ki tyllong um ha ka khlaw Malki bad u ju sngew lyngngoh ïa ki engineer jong ki por mynshuwa ha kaba la pynkhuid ïa ka um da ki maw shyiap bad lah ban dih beit khlem da ka jar ne filter. U la ong ba ka pung jngi Crinoline ka ïoh ïa ka tynrai na Umrisa kaba don ha khlaw Malki.
U Chief Secretary barim, u la ong ba ki longshuwa ki tip ba u Lum Shyllong u dei u jaka ba kongsan bha khamtam na ka bynta kiba shong ha ka Laban baroh kawei bad kumjuh ruh ia ki nongshong shnong ka sor Shillong kiba ioh ka umbam umdih na une u Lum Shyllong.
“U Lum Shyllong u dei u tyllong um na ka bynta kiba bun ki wah ba kongsan jong ka nongbah Shillong bad shabar jong ka,” la ong u bah Warjri.
U la bynrap ruh ba ki longshuwa ki la tip bha ïa ka jingkordor jong ki wah bad ki khlaw ki btap.
Katba ka dkhot ka JAC ka kong Olivia Lyngdoh ka la ong ba ki nongshong shnong kim kwah ïa ki lynti ïaid nar (ropeway) kumba long ha Switzerland hynrei ki kwah ïa ka rukom im jong ki briew ha katei ka ri.
Haba kren ha kane ka jingialang ka kong Olivia ka la ong ba u Bah Paul Lyngdoh uba long u myntri barim ka tnad jngohkai pyrthei ha ka social media page jong u, u la kren halor ka jingdon jingma jong u Lum Shyllong, nangta halor u lum bad ka la buh jingkylli ba kumno ma u haba u don ha ka bor u mynjur ban pynlong ïa ka Lum Shyllong kum ka jaka jngohkai pyrthei.
Ka la ong shuh shuh ba kane ka projek kan pynlong ïa ki pateng ban wan ban long tang ki nonglum bai ïeng kali bad ki nongdie tiket.
Kane ka jingïaid rally ka la sdang na Ïew Last Stop bad la pynkut hapoh ka jaka ba la pyntrei ïa ka project bad ha kane ka jingïaid rally ki la pynlong ki jingpyrta pyrshah sorkar bad dawa ban pyndam noh ïa kane ka projek bad ki la rah ruh da ki placard kiba don ki jingthoh ba bun jait kiba long pyrshah ïa kane ka projek.