Nongstoiñ, Jylliew 16: Ka Brightstar Academy kawei na ki shlem ai jinghikai phutbol ïa ki khynnah hapoh ka sor Nongstoiñ, ka la rakhe ïa ka jingïap 1 snem ha ka jingïalang kaba la long hapoh Mecofed Hall New Nongstoiñ ha kaba u bah GJL Sangriang Assistant Agriculture Engineer (Mech) u la long kum u kongsan.
Ha katei ka sngi na ka liang jong ka Brightstar Academy kum ka dak jong ka jingrakhe, ka la ïoh ruh ban ot ïa u cake bad la ïoh ruh ban sam ïa ki syrnod sha ki khynnah under 12, kiba dei ki khynnah kiba nyngkong kiba wan ban rung bad shah hikai ha katei ka shlem ai jinghikai. Kumjuh ruh ka Academy ka la ïasoi ruh ïa ka MOU bad ka Mawkhar SC kaba na nongbah Shillong.
Ïa ka Brightstar Academy la seng da kaba jer kyrteng ïa ka ban pynsah nam ia u (L) Brightstar Kharbudon bad la plie ïa katei ka shlem ha ka 14 tarik u Rymphang 2024. La sdang ïa ka jingai jinghikai ha ka 16 tarik u Rymphang 2024 bad ha katei ka por ba plie ki don 10 ngut ki khynnah. Hynrei mynta ki la don haduh 80 ngut ki khynnah kiba dei na kylleng ki jaka jong ka West Khasi Hills.
Katei ka Academy mynta ka la don ha ka kyrdan 2nd Division jong ka NDSA bad la ong ruh ba ha ka 23 tarik u Lber mynta u snem, kane ka Academy ka la ïoh ruh ban plie sa kawei pat ka shnat ha Mawlyntriang Mairang Eastern West Khasi Hills Dstrict. Ka Academy ka la pynkup burom bad ai sngewbha ruh ia ki player jong ka Academy kiba don ha ka 1st team kiba la lah ban pynkiew sha ka 2nd Division jong ka samoi ïalehkai 2025-2026 ka NDSA.
