Da ka marathon kaba 5km yn pynlong ka DSO Ri-Bhoi ha ka 25 tarik Jylliew
Ban rakhe ïa ka International Day against Drug Abuse
SHILLONG, Jylliew 16: Ka Shlem treikam jong ka Ophis u District Sports Officer [DSO], Ri-Bhoi District, Nongpoh ha ka jingïatreilang bad ka Ophis u District Social Welfare Officer, Ri-Bhoi District Nongpoh kan pynlong ïa ka jingïakop mareh kaba 5 kilomitar ha ka 25 tarik Jylliew, 2025. ïa kane ka jingïakop la jer kyrteng da ka “5K Run Against Drug Abuse and Illicit Trafficking”.
Kane jingpynlong ïa kane ka jingïakop mareh ka long shi bynta ban snohktillang ha ka ban rakhe ïa ka ‘Observation of International Day against Drug Abuse & Illicit Trafficking 2025’ kaba pyrshah ïa ki jingdih drok, ki jingdih ba pynbuaid bad ka khaïi be-aiñ.
Ka Ophis jong u DSO bad DSWO ka Ri-Bhoi ka la pyntip ruh ba kane ka jingïakop mareh ka kynthup lang ïa kiba la heh la san (open category), na ka bynta baroh Shynrang bad Kynthei kiba la palat 14 snem shaneng (above 14 yrs). Yn kaweh ïa ka lama ban sdang ïa ka jingmareh na Saiden Indoor Hall bad pynkut sha NSCA Indoor Hall, Umlyngkdait ha ka 25 tarik Jylliew, 2025 ha ka por 7 baje mynstep.
Kan don ruh ka jingsam khusnam ïa ki nongjop, ha kaba kiba wan ba nyngkong (1st) kin ïoh ïa ka khusnam pisa kaba T.2,000/-, nangta uba wan ba ar (2nd) ka khusnam pisa ka long T.1,500/-, katba kiba wan balai (3rd) kin ïoh khur T.1,000/-. Kan don ruh ka khusnam ba kyrpang tang na ka bynta ki nongïashim bynta kiba la kham rangbah.
Kiba kwah ban ïashim bynta kin sngewbha ban pynrung kyrteng ïalade ha Ophis jong u District Sports Officer, Ri-Bhoi District, Nongpoh, ha ka por long trei. Ka tarik ba khatduh ban pynrung kyrteng kan long ha ka 24 tarik u Jylliew, 2025. Ki nongïashim bynta kiba la kham rangbah ki dei ban wanrah ïa ka Original Epic Card ha ka por ba pynrung kyrteng bad ha ka sngi mareh (Run).
La kyrpad ruh ïa ki nongïashim bynta ki nongmareh baroh ba kin poi noh ha ka por 6 baje mynstep ha ka 25 tarik u Jylliew, 2025 ha ka jaka sdang.
Kumta na ka liang jong ka Ophis u District Sports Officer, Ri-Bhoi District, Nongpoh u khot sngewbha ïa baroh kiba kwah ban ïashim bynta na Ri-Bhoi ban ïashimbynta ha kane ka jingïakop mareh. Ka Ophis ka khmih lynti ïa ka jingïashim bynta jong phi.
Kane ka long katkum ka kyrwoh jong ka Shlem treikam jong ka Ophis u District Sports Officer [DSO], Ri-Bhoi District, Nongpoh, ha kaba ïadei bad ka 5K Run Against Drug Abuse and Illicit Trafficking.