Da ka rally ba jar jar ïaid paidbah ki nong Sohra, thang mombati sngewlem ïa u Raja

Shillong, Jylliew 10 : Ka thaiñ Sohra ha ka sien kaba nyngkong eh ka la pynlong ïa ka rally ba jar jar kaba sdang naduh ka phyllaw jong ka ophis u Syiem ka Hima Sohra bad pynkut pat haduh Saitsohpen, ban pynrem jur ïa kito kiba kynthoh ïa ka Sohra kum ka jaka bym shngaiñ na ka bynta ki nongwan jngohkai pyrthei.
Ha kane ka jingïaid paidbah kaba la don kumba 6 kilometer ei ei la wan ban shim bynta naduh ki longkmie, ki longkpa bad kumjuh ki samla nalor u MLA ka thaiñ Bah Gavin Mylliem, nangta u MDC Bah Titos W Chyne nalor u SDO Bah MA Challam, SDPO Bah Pynhun Syiem nalor u Syiem ka Hima Khyrim, ‘Paiem F Syiem kumjuh u Syiem Khynnah ‘Paiem Marremdor Syiem nalor ki Myntri, ki Bakhraw bad ki nongïalam shnong bad kiwei kiwei.
Ryngkat ka jingsynran lang ki bor pulit, ha kane ka jingïaid paidbah kam shym la don satia ka jingïa rkhie ïa kynhoi ne kano kano ka jinghylla hynrei ka long beit jar naduh ka jaka ba sdang tad haduh ban da poi sha ka jaka ba la buh, kaba shim por haduh kumba shi kynta ei ei.
Na ka liang kiba bun ki nongkren ha kane ka sngi, ka phang pdeng ka long beit ban dawa ïa ki lad pathai khubor na shabar ne ki National Media ba ki dei ban panmap paidbah na ka thain Sohra halor ka jingai nam sniew ïa ka thaiñ ba ka dei ka jaka ka bym shngaiñ ïa ki nongwan kai tang na ka daw ka jingjia shah pynïap jong u Raja Raghuvanshi.
Bun ki nongkren ki la ïai ban ruh ba mynta ba ka jingshisha ka la paw pyrthei ba dei ka kurim jong u hi kaba leh ïa kane ka kam, kumta ki la dei ban mih shakhmat ban panmap mardor khlem pynslem shuh.
Na ka liang u MLA ka Sohra, haba pynrem lang ïa kane ka jingshah kynthoh u la ong ba ki nong Sohra ki la mad ïa ka jinglynga kaba haduh artaiew tam tang na ka daw ka jingjah jong ki shijur kiba wan kai honeymoon sha ka thaiñ. “Ka jingthmu jong kane ka rally ka long ban pynrem jur ia ki katto katne ki lad pathai khubor na shabar bad ïa ki katto katne ki briew kiba kwah ban pynthohbria ïa ka thain jongngi hi baroh kawei,” ong u MLA.
Ha kajuh ka por u la ai ruh ka jingkhublei ïa ki pulit kiba la trei borbah ban wad haduh ban da lap ïa u Raja bad khamtam eh ban sei pyrthei syndon ïa ka jingdonkti ka kurim jong u ha kane ka kam.
Katba na ka liang u MDC ka Sohra, Bah Titos u la ong ba nalor ki National Media ki don ruh ki para Khasi kiba la don bynta lang ha kaban kynthoh bad kynnoh harukom ïa ka thaiñ Sohra da kaba kynnoh ba kane ka thaiñ kadei kum ka jaka ba bun ki menshohnoh.
“Ngi ai por ïa ki hapoh 24 kynta ba kin wan panmap bad lada kim wan ngin ujor da ka FIR,” ong u Bah Titos. Ha kawei pat ka liang u la ong ba ka sorkar jylla kadei ban pynkup burom ïa ki lai ngut ki guide ne ki nongïalam lynti ïa ki nongjngohkai pyrthei kiba la ïarap ïa ki pulit ha ka jingjia ïa u Raja Raghuvanshi.
Ha kane ka sngi la ïoh ruh ïa ka jingkren na u Syiem Khynnah, nangta na u SDO Civil bad ruh kumjuh na ki nongïalam shnong, na ki longkmie bad ruh na u Bah Alan West Kharkongor uwei na ki nongïalam ba hakhmat eh ba peit ïa ka kam jngohkai pyrthei ha ka jylla.
Ynda la wai ka jingialang pat ka la don pat ka jingthang mombati sngewlem ïa u Raja Raghuvanshi uba la kylla long u lanot ha kane ka jingjia ba sngewsih kaba u la kynduh ha ka jingwan kai honeymoon bad ka kurim hadien ba la dep ïathoh.