Nongpoh, Jylliew, 10: Hadien ba la kut noh ka samoi trei kam ka Dorbar Shnong Nongpoh, kaba dei ka Head quarter ka Ri Bhoi District, ka Dorbar Shnong Nongpoh ka la pynlong da ka election ban jied biang ïa u Rangbah Shnong bad ruh ïa u Secretary Shnong bad na ka bynta ban pynlong ïa ka jingjied kaba khuid kaba suba khlem da shah liang la pynlong ïa ka jingïajied ïa u Rangbah Shnong bad Secretary Shnoing da kaba thep vote lyngba ki Secret Ballot.
Ïa kane ka election jied rangbah shnong bad Secretary Shnong ka Shnong Nongpoh na ka bynta ka samoi treikam jong u snem 2025 haduh u snem 2028 la pynlong ha ka sngi Saitjaiñ ha Dorbar Hall, Sajer Nongpoh bad ki paidbah Nongshong shong shnong ki la mih ryntih ban jied da kaba thep vote ïa u Rangbah Shnong bad Secretary Shnong katkum ka jingsngewbit jong ki.
Na ka bynta ka kam Rangbah Shnong, ki don 5 ngut ki Kyrtong ba kynthup ïa u Bah Sylvester Mynsong, u Bah Bul Lyngdoh, u Bah Plielad Tiesoh, u Bah Royal Born Suiting bad u Bah Skhemlang Marai bad na ka bynta ka kam Secretary ki don 3 ngut ki kyrtong ba kynthup ïa u Bah Anthony Suchiang, u Bah Michael Kharhunai bad u Bah Lambor Thangkhiew.
Kumba la pynkupbor ne ai rai da ki paidbah kiba la kot haduh 960 ngut kiba wan thep vote, u Bah Sylveter Mynsong, Rangbah Shnong barim u la shah jied biang kum u rangbah Shnong ba thymmai ka Nongpoh da kaba u la ïoh ban khur 308 vote bad u Bah Anthony Suchiang, Secretary barim u la shah jied biang kum u Secretary Shnong ba thymmai u la ïoh ban khur haduh 543 vote.
Hadien ba la pynbna ïa ka result, ba u Rangbah Shnong barim u Bah Sylvester Mynsong bad u Secretary barim u Bah Anthony Suchiang u la shah jied biang kum u Secretary ba thymmai, la wan ruh ban ai ka ka jingkyrkhu kyrdoh da u Lyngdoh ka Raid Nongpoh, u Bah Linus Lyngdoh lem bad ki Longsan ki mansan ka Raid Nongpoh.
U Lyngdoh ka Raid Nongpoh Bah Linus Lyngdoh nalor ka kyrkhu kyrdoh ïa kane ka shnong kaba la ïoh biang ïa ki nongïalam shnong ba thymmai bad u la buh ruh ka jingkyntu kynpham ba don ka jingïatrei lang bad ka mynsiem jong ka jingïatylli khnang ba ka Shnong Nongpoh kum ka Head Quarter ka Ri Bhoi kan dang kiew shaphrang ha baroh ki liang.
