Jowai, Jylliew, 06: Hadien ba ka Shillong bad Tura ki la ïoh ïa ka Examination Centre na ka liang jong ka Jaiñtia Students’ Union (JSU) Shillong Circle ha ka sngi Thohdieng ki la leit ïa kynduh ïa u Commissioner & Secretary Education Department, jong ka sorkar jylla u Vijay Kumar Mantri IAS ban dawan buh ïa ki CUET exam centre ha Jowai bad ha ki jaka ba hap hapoh Jaiñtia Hills.
Ka JSU ka la pynpaw balei donkam ïa ki CUET exam centre ha Jowai bad Jaiñtia Hills, namar ki don bun ki daw kum ka jingjngai, ka jingshakut ka lai (traffic jam) ha Shillong teng teng ka pyndik ïa ki ban poi biang por sha ki jaka thoh exam.
Sa kawei ruh ka ktah bha ïa ki khynnah ba wan na ka longïing baduk, naduh ka bai kali, bai bam, jaka sah bad kiwei kiwei ki jingdonkam.
Nalor kine ka Jaiñtia Hills ka dang long kaba sahdien ha kaba ïa dei bad ki jaka thoh exam lane ki infrastructure ha kaba ïa dei bad ka pule puthi. Te na ka liang ka JSU ka kyrpad jur ïa ka sorkar ban buh noh ïa ki centre.
Halor kane ka jingdawa na ka liang jong u Vijay Kumar Mantri u la kular ïa ka seng JSU ban buh ïa ki CUET exam centre bad ban phah leit survey ïa ki jaka ba lah ban buh ïa ki exam centre.
Shuh shuh ka seng ka la pyntip ba ki long kiba kloi ban ïarap ïa ka sorkar khnang ba kane ka kam kan long kaba ïaid beit bad ki khynnah kin kham skum ban leit thoh exam CUET, pynkut ka kyrwoh na u Adviser JSU Shillong Circle samla A. Suchiang.
