Nongstoiñ, Jylliew, 06: Ha ka miet sngi palei, ki Pulit ka Nongstoiñ bad ANTF ki la ïoh ban kem ïa uwei u snar nongkhaïi drok ha thaiñ Nongstoiñ West Khasi Hills, ha kaba ki la ïoh ban ïoh kurup ïa u drok heroin u haduh 7.79 gram.
Une u snar nongkhaïi la tip kyrteng u Teiborlin Mawlot ba 37 snem ka rta u ba dei na ka shnong Mawkaton bad u ba shongwai ha Themiew Nongstoiñ.
Ki Pulit ki la suba la slem ïa une u briew ba u dei u nongkhaïi drok bad ki la pynlong ïa ka jingbuddien la katto katne por. Halor ka jingïoh jingtip ba une u briew u la leit jingleit da kawei ka kali kamai ML06-8004, ki Pulit bad ANTF ki la pynap shrip ha ka surok Nongstoiñ-Shillong mar pyrshah ka petrol pump Indian Oil, Nongstoiñ.
Ki ïathuh ba ka kynhun ka la bat ïa kane ka kali ha ka jingïadonlang ki nongsakhi shimet bad ha ka jingtalasi ïa ka met jong u, la ïoh ban kurup haduh 21 tylli ki bilor rit ba thep drok, kawei ka mobile phone, ka pisa T.500 bad ka lut T.10. Ïa une u briew la kit noh sha Nongstoiñ Police Station bad la register case hapoh ka kyndon aiñ NDPS Act.
