Munich, Jylliew 05: Lyngba ka shi kol jong u khlur thep kol ba pawnam jong ka pyrthei bad kumjuh ruh ka klob Al-Nassr u Cristiano Ronaldo, ba ha ka shiteng miet jong ka Sngi Balang une u khur thep kol u la lah ban pynjop ia ka Portugal bad ban poi sha ka phainal jong ka Nations League. U Nuno Mendes u la long u rangialehkai ba tbit tam ha kane ka jingialehkai pyrshah ia ka Germany.
Ka jingialehkai hapdeng ka Germany bad Portugal ka long kaba shongshit bha ha kaba ka Germany ka la ioh ban pynkhih shwa ia ka jar ba nyngkong lyngba u Florian Wirtz ha ka minit ba 48, hynrei ka Portugal khlem khein sting ka la ia khun tyngeh haduh ban da lah ban pynphai kylla ar kol lyngba u Francisco Conceicao ha ka minit 63, bad sa pynbud sa ka kol jong u rangialehkai ba 40 snem kyrta u Cristiano Ronaldo ha ka minit ba 68.
U Ronaldo wat hapdeng ka jingshah kynthoh ha ki ba bun khamtam ki rangialehkai ba mar katjuh kyrta bad u, hynrei une u rangialehkai ba pawnam ka pyrthei um shem sngap satia ia ka jingshah kren bein bad kynthoh.
U Ronaldo u la lah ban thep 937 tylli ki kol ha ka jingim jong u kum u rangthep kol, u la ioh pynkhih jar kumba 137 kol tang na ka ri Portugal bad 800 tylli ki kol na ki klob kiba u la mih madan.
Na ka bynta u Conceicao, ka jingjop ia ka Germany ka long kaba kordor bad kaba kham khraw, namar ba u kpa jong u, u Sergio, u la thep hat-trick ha ka sien kaba khatduh ba ka Portugal ka la jop ia ka Germany- ha ka European Championship ha u snem 2000.
“Ngi dei ban kmen bad ban leh sngewbha ia ka jingjop nynnin ka miet ba ngi la lah ban pynrem noh ia ka Germany ba khlain bor ha ka semi phainal bad ha kaba iadei bad ki buit lehkai, ngi la long kiba kyrpang bad ka kynhun jongngi ka dei hok ruh ban lehkmen ia ka jingjop,” ong u coach ka Portugal u Roberto Martinez.
Ka phainal jong ka UEFA Nations League kan sa long ha kane ka shiteng miet Sngi U Blei haka por 12:30 mynstep ha kaba ka Portugal ka dang ap kawei na ki ba jop Spain lane France ban ia aireng ha ka phainal.
