Nongpoh, Jylliew 04: Da ka jingangnud ban kyntiew bad rah shajrong ïa ka kam jngohkai pyrthei haka jylla, u Myntri Rangbah ka jylla u Conrad K Sangma mynta ka sngi u la plie bad pynlait paidbah ïa ki lieng ha pung Umiam ba la jer kyrteng kum ki Meghalinor.
Ha kane ka sngi ka jingplie paidbah ïa kitei ki lieng kiba pyndonkam ban lehkai sports bad haka juh ka por ban khring ïa ki nongjngohkai pyrthei la sakhi ruh da ka jingdonlang u Bah Paul Lyngdoh Myntri ka tnad jngohkai pyrthei ka jylla, Dr. Vijay Kumar Commissioner and Secretary ka tnad Tourism, u Bah Cyril V. D. Diengdoh, Director ka tnad Tourism bad kiwei kiwei ki heh sorkar ryngkat ki nongkieng lieng haki bynta bapher bapher.
Haba kren ha katei ka sngi na ka liang u Myntri Rangbah ka jylla u la pynkynmaw halor ka jingdonkam ka kam jngohkai pyrthei ban kyntiew bad rah shajrong ïa ka jylla wat haka ioh ka kot bad ka roi ka par, bad kane ka jingthmu jong ka sorkar kam dei tang ban kyntiew ïa ki kam jngohkai pyrthei bad ban khring ïa ki briew ba nabar hynrei ban long ruh ka lad kamai bad ka lad iohkam iohjam ki khun samla jong ka jylla.
Na ka liang u Bah Paul Lyngdoh kum u Myntri ka tnad jngohkai pyrthei u la pynpaw ka jingsngewkmen kaba khraw ba ka sorkar jylla ka la lah ban wanrah ïa ka Meghalinor Yatch ban kyntiew ïa ka kam jngohkai pyrthei bad ka jingitynnad jong ka pung Umiam bad don ruh ka jingangnud ban wanrah shuh shuh ïa kum kitei ki jait lieng bad wat ki lieng ba kham heh kiba lah ban kit kumba 140 haduh 150 ngut ki briew.
