Nongstoiñ, Jylliew, 04: Ka Sib Sing Memorial Govt HSS ka la jan duh ïa ka Commerce Stream (Day Shift) bad Arts Stream (Morning Shift), namar ka khlem paw ha ka list ban shah kynthup ha ka mang jong ka sorkar ban kyntiew shuh shuh ïa ka seat na ka bynta ki khynnah skul kiba pule ha ka Arts bad Commerce Stream.
Ïa kane la pynpaw ha ka sngi ba ar da ki nongpynïaid jong ka skul Sibsingh kiba la shaiong ngaiñ, namar wat hadien ba la bthah ïa ki ban phah ïa ka jingtyrwa hynrei ynda la pynmih ïa ka list pat ka Sib Sing kam shym la don.
Ka Principal kong D. Hoojon ka la pynpaw ba ka la phone sha u MLA bad ha ka jingïakren jong u MLA ka Nongstoiñ Bah Gabriel Wahlang ryngkat bad u Myntri Rangbah u Conrad K.Sangma, la lah ban pynurlong ha ka sngi Baar bad na ka liang jong ka skul ka la plie paidbah ïa ka Class XI Commerce Stream (Day Shift) bad Arts Stream (Morning Shift).
U Bah Gabriel Wahlang u la plie paidbah ha ka sngi ba ar, ha ryngkat ka jingïadonlang u Bah H.K.Thabah, Additional Deputy Commissioner ka West Khasi Hills, ka Kong D. Hoojon, In-Charge Principal jong ka Sib Sing Memorial Govt. HSS kaba la pynïaid ruh ïa ka jingïalang, ki nonghikai jong ka skul, ki khynnah skul, ki kmie ki kpa bad kiwei pat ki nongïashim bynta.
U kongsan haba ai jingkren u la ai ka jingïaroh ïa u Myntri Rangbah ka jylla halor ka jingshah shkor jong u ïa ka jingkyrpad ban pynïoh ïa ka Commerce bad Arts Stream ha kane ka skul. U la ong ruh ba ha ki snem ba mynshwa ym pat don ïa ka Commerce stream bad ka Arts stream mynstep.
Hynrei, hadien ba ka skul ka la phah ïa ka jingtyrwa bad hadien ba u la ïakren bad u Myntri Rangbah, u la shimkhia bad mynta ngi la lah ban plie paidbah. Na ka liang u MLA u la buh ruh ka jingkyntu ïa ki samla pule ba kin trei shitom bad pynkhreh bha na ka bynta ban poi sha la ki thong ha ka lawei.
Kiwei kiba la ai jingkren ki long u Additional DC ka West Khasi Hills Bah H.K Thabah, Kong Y. Nongkynrih, Assistant Lecturer bad kiwei kiwei.
