Lait na ka shlei um, ngat sa ha ka ahor ktieh na ka jingtih khyndew khlemakor, khang tala ka FKJGP

Nongpoh, Jymmang 31: Sa kawei pat ka jingeh ki paidbah ha ka thaiñ Jorabat bad kumjuh ruh kiba leit ba wan ki la hap ban mad hadien ba u slap u la sdang ban rang bad duna bad ka um ka la sdang ban rngad, hynrei mynta ka sngi sa ka ahor ktieh ka la tuid bad lang sha surok bah bad ki lynti ïaid kjat jong ki paidbah na kadaw ka jingtih khyndew khlemakor ha katei ka thaiñ kaba la pynjynjar ïa ki paidbah ba leit ba wan.
Kumba ka sorkar jylla ka la pynbna ba ki paidbah ki dei ban phikir ha kum kane ka por ba jur slap hynrei phewse la don pat kiba leit tih khnang syndon ïa u lum hapdeng ka jingma na ka jingjur slap ha kine ki khyndiat sngi bad ka jingmaham na ka tnad SDMA haduh ba kawei ka iing briew ka la jan hap lang bad ka khyndew ba twa.
Kane ka jingtuid ka ahor ktieh ka la buh jingeh shikatdei ïa ki paidbah ba leit ba wan bad ki nongshong shnong ha katei ka thaiñ, khamtam ka jaka ieng jong ki auto kamai la dap da ka ktieh ba tuid na katei ka jaka.
Tang hadien ka jingioh jingujor, ka Federation of Khasi Jaintia and garo People Byrnihat Circle hapoh ka jingïalam u Devos Chyne Vice President lem bad ki nongïalam ka 12 mer Unit ki la hiar mar mar sha katei ka jaka ban leit jurip ïa katei ka jingtih khyndew khlem akor bad kumjuh ruh ka jingpyntbhei maw ha katei ka jaka, ha kaba na ka liang ka seng ka la wat ruh ïa ki trai ba pyntih ïa katei ka khyndew hynrei ki khlem wan mih satia kaba la pynbitar ïa ka seng haduh ba kim banse ban khang tala syndon ïa ka khyrdop ban rung sha katei ka jaka tih khyndew.
Na ka liang u Bah Devos Chyne u la ong ba katei ka jingtih khyndew khlemakor ka buh jingma shikatdei namar ka jingpynbthei maw ha ka juh ka por bad lada wan jia ka jingjia ba sngewsih ba shna hi u briew bad katei ka iing kan twa lang bad ka khyndew mano ban bah khlieh, kumta ka seng ka la khang tala syndon ba kumno utei u briew u nud ban tih khyndew ha kum kane ka por.
Kiba bun na ki paidbah ha katei ka thaiñ ki la pynpaw ka jingsngewkhia kaba jur halor katei ka jingjia da ka jingkhmih lynti ba u slap u la duna bad lait noh na ka jingshlei um, phewse ki hap ban mad sa kawei pat ka jingeh kaba kham shyrkhei shuh shuh.