Banjur u Principal Secretary ECI ban pynrung kyrteng thymmai ïa kiba la lah ban thep vote

Shillong, Jymmang 30: U Principal Secretary, Election Commission of India u Malay Mallick uba khmih ïa ka Meghalaya u la wan ban jngoh ïa ka jylla ha kine ki arsngi ban ïakren ïa kiba bun ki kam ba ïadei bad ki kam electoral roll, polling station, EVM & VVPAT warehouse bad kiwei.
Ha ka jingwan jngoh kaba nyngkong, la pynlong ïa ka jingïalang bad ki district election officer (DEO) Ri Bhoi District ha ryngkat bad ki electoral registration officers (EROs), assistant electoral registration officers (AEROs), BLO-Supervisors bad ki booth level officers (BLOs).
U la leit ruh ban jurip ïa ka EVM & VVPAT warehouse kaba don ha district headquarter ha Nongpoh.
Ha ka sngi ba ar la pynlong ka jingïalang ha additional secretariat bad u chief electoral officer Dr BDR Tiwari bad ïasyllok ruh ba ka kynhun ka election ka jylla.
Ha kane ka jingïalang, u CEO ka Meghalaya u la ïathuh ba ki don haduh 3551 tylli ki polling station bad ka jingdon kiba thep vote ka long 2290854 ngut ba kynthup ïa 1129482 ki shynrang bad 1161366 ki kynthei bad 6 ngut ki third gender ha ka jylla.
Ka average number jong ki nongjied ha kawei kawei ka polling station ka long 645, hynrei ki don khyndiat ki polling station kiba don palat 1200 ngut ki nongjied ha kawei kawei ka polling station bad kine ki polling station kin donkam ïa ka jingpynïasoh lang bad ban thaw thymmai ïa ki polling station.
U principal secretary, ka ECI u la pynpaw ruh ïa ka jingdonkam ban pynduh noh ïa ki kyrteng jong ki nongjied kiba la khlad noh na ka electoral roll bad kumjuh ruh ban pynrung kyrteng ïa ki nongthep vote kiba la dei ka rta khnang ba kiba thep vote kin ym shah ieh noh shadien.
U la leit ruh ban jngoh ïa ki kamra kiba la pynthymmai jong ka tnat election kaba mynshwa la sam sha ki block bapher bapher jong ka Meghalaya secretariat building bad mynta la pynkynriah sha Meghalaya secretariat additional building.
U la ïasyllok bad ki ophisar ki nongtrei bad pynpaw ka jingsngewhun ba ki kamra jong ki officer bad ki nongtrei la lah ban pyndep bad pynheh khnang ban lah ban pyndep ïa ki kam.
Hadien ka jingïalang bad u CEO ka kynhun ka jylla na ka tnat elekshon, u la leit ruh ban jngoh katto katne ki polling station kiba don ha kylleng ka nongbah. U la khot ka jingïalang bad additional deputy commissioner (election), East Khasi Hills district ha ryngkat bad ki ERO, AERO, BLO-Supervisor bad BLO, supervisor bad kumjuh bad u la jurip ïa ki EVM & VVPAT warehouse ha Shillong.