Kren shai ka DS Khimusniang bym shah ïa ki kynhun nabar ban tuklar ïa ki kam shnong

Jowai, Jymmang, 30: Ka Dorbar Shnong Khimusniang, Jowai kaba la shong jingïalang kyrkieh ka la rai ban pynshai sha ki paidbah ha ka jingïadei bad ka khubor kaba la pynmih da ka shnong ha ka 26.5.2025 bad kumjuh ïa ka jingpynshai jong ka Jaiñtia Students’ Union (JSU).
Haba kren sha ki lad pathai khubor, u Waheh Shnong Bah Titos Bamon ula ong ba ka shnong ka la kren shai sha ka JSU ba kam shah ïa kino kino ki kynhun ne ki riew shimet ban wan tuklar ïa ki kam shnong khlem da ai jingpyntip shwa sha ka shnong, namar haduh mynta tang ka shnong hi kaba peit ïa ki kam babha bad ka shongsuk shongsaiñ hapoh u pud u sam ka shnong.
Ka shnong ka la pynsngew hadien ka jingud jingnam jong ki paidbah ha kaba ïadei bad u surok uba ïaid shaduh Urkhla ka jaka ba don ka Treatment Plant jong ka P.H.E, da kaba pynsngew ba kane ka kam ka la sah teng da ki bun bun snem bad haduh mynta ka shnong kam shym la shong kli kti ban buddien ïa kane ka project.
Ka shnong ka la kren shai kino kino ki skim hapoh u pud u sam ki don hadpoh ka jingpeit jong ka shnong, lada don kiba kwah ban ïoh jingtip na ki kynhun sengbhalang halor kane ka skim balei kim wad jingtip shwa na ka shnong ban ïoh ïa ka jingshisha, la ong u ma Bamon.
U Bah Bamon ula pynsgew na ka liang u MLA ruh ula dep ban kular lypa ha ka 31 tarik, Risaw, 2024, ha ka por ba pynlong ïa ka Fete jong ka Dorbar Shnong Khimusniang ba un pynïoh kum ka jingai sngewbha Christmas/New Year Gift na ka bynta utei u surok Urkhla shaduh TP Plant ka P.H.E. kaba ar ula kular ruh ïa u Surok ba dang sah teng na ka Scheme Synod kaba naduh u snem 2008 ïa kane ruh yn pynïoh noh.
Kumta ka DSK ka kwah ban kylli ïa ka JSU Jowai Circle nangno ka ïoh bor ban wad skim ïa ka shnong khlem da ïoh bor shwa na ka shnong bad mano ba ai bor NOC ïa kino kino ki kam pynroi hapoh ka shnong? Labuh jingkylli ka shnong. Ka shnong hadien ka jingwad ïa ki nongïalam ka JSU Jowai Circle la lap pynban ba ki dei ki dkhot bad ki khun jong ka shnong hi, kumta ka shnong katkum ka riti treikam Constitution, ba uno uno uba pynkheiñ ïa ki kyndon aiñ shnong lada dei u minister/officer/ u baduk ne ba riewspah un hap ban shah Summon, khnang ban pynbeit ïa ki jingbakla kiba shakhmat.
U Waheh shnong ula ong ka JSU kam sngewthuh ïa ka rukom treikam jong ka kyrteng ka seng Jaiñtia Students’ Union ne ka (Seng Samla Pule Jaiñtia) bad ka kamram jong ki, ka dei ban ïarap ban ïakren nyngkong ïa ki jingeh jong ki khun samla kiba duh klas (admission), ki Solarship ki samla pule, ban pynïoh ïa ki College/Hostel kiba biang khnang ban ïoh jingshañiah na ki paidbah.
Na ka bynta ki kam pynbha pynmiat ïa kino kino ki skim lane ki project hapoh ka shnong ka Dorbar Shnong Khimusniang naduh u snem 1949 ka la leh katkum ki kyndon treikam ka shnong, khlem kano kano ka jingleh Politic kumba la kynnoh da ka JSU. Da kaba kyntu ïa kino kino ki seng ne kynhun lada ki kwah ban pynbha ïa ki kam pynroi ki dei ban ïatreilang da kaba ai jingtip sha ki bor shnong.
Haba pynkut ïa ka jingkren u ma Bamon ula ong ba ka Dorbar Shnong Khimusniang ka don ka nongrim ban khang pyrshah ïa ki riew shimet, NGos, Association ban pan Schemes na ki MLA/MDC/Govt. Departments khlem da ïoh jingbit lane ïaid lyngba ka Dorbar Shnong Khimusniang.